"Sumqayıt"ın baş məşqçisi Samir Abasov və klub akademiyanın koordinatorları Baba Əsgərovla Sabir Əliyev Xorvatiyanın "Dinamo" (Zaqreb) komandasının düşərgəsinə yollanıb.
Sportnet.az-ın məlumatına görə, səfər iki klub arasındakı razılıq əsasında baş tutub. Mayın 20-dək davam edəcək səfər AFFA-nın və Azərbaycan milli komandasının baş məşqçisi Robert Prosineçkinin dəstəyi ilə həyata keçirilib.
Qeyd edək ki, təcrübə məqsədi ilə ölkə xaricindəki klublardan birinə yollanmaq Samir Abasov və Baba Əsgərovun UEFA-nın "Pro" kateqoriyalı məşqçi kurslarını uğurla başa vurması üçün önəmli şərtlərdən biridir. Sabir Əliyev isə bu səfər zamanı adıçəkilən klubun aşağı yaş qruplarında qurulmuş sistemlə yaxından maraqlanacaq. Ümumilikdə isə hər 3 məşqçi Xorvatiyada olduğu 5 gün müddətində "Dinamo"nun məşq prosesini izləməklə yanaşı, akademiyanın iş prinsipi ilə də yaxından tanış olacaq. Məşqçilərimiz Xorvatiyada olduğu müddətdə U-17 Avropa Çempionatının final oyununu da izləyəcək.
