"Doğma və futbola göz açdığım komandaya qayıtdığım üçün şadam".
Sportnet.az-ın məlumatına görə, bunu "Sumqayıt"la icarə müqaviləsi bitdiyi üçün "Neftçi"nin sıralarına dönən Mirabdulla Abbasov deyib. 22 yaşlı yarımmüdafiəçi bildirib ki, hələlik məşqlər fiziki hazırlıq üzrə aparılır: "Bərpa prosesinə başlamışıq. Əhval-ruhiyyə yaxşıdır. İnanıram ki, hər şey yaxşı olacaq. "Neftçi"nin əvvəlki günlərində olduğu kimi oynamasından ötrü əlimizdən gələni edəcəyik".
Abbasov azarkeşlərə minnətdarlıq etməyi də unutmayıb: "Onlar "Sumqayıt"da olduğum müddətdə də mənə böyük dəstək oldular. Bundan sonra daha artıq dəstəkləmələri üçün əlimdən gələni edəcəyəm. Onlara "çox sağ ol" demək istəyirəm".
Qeyd edək ki, Mirabdulla Abbasov 2016-2017 mövsümündə "Sumqayıt"ın heyətində Azərbaycan Premyer Liqasında 7 qol vurub. O, komandanın ən yaxşı bombardiri olub.
