Ermənistan Premyer Liqası və I Divizionunda mübarizə aparacaq komandalar müəyyənləşib. Sportnet.az-ın məlumatına görə, elitada 6 komanda mübarizə aparacaq.
Bunlar ötən mövsümdəki kimi, "Şirak", "Banants", "Qandzasar-Kapan", "Ararat", "Pünik" və Alaşkert"dir. Çempionat 5 dövrə və ya 30 turdan ibarət olacaq.
I Divizionda isə 10 klub çıxış edəcəklər ki, onlardan 6-sı Premyer Liqa təmsilçilərinin ikinci komandaları, qalanları "Avan Akademiyası", "Erebuni" "Lori" və Azərbaycanın işğal olunmuş ərazilərində yaradılmış qondarma respublikanın adını daşıyan "Artsax"dır.
Ermənistan Kubokuna gəldikdə, mübarizə 1/4 finaldan başlayacaq. Bu yarışa Premyer Liqadakı 6 komandadan əlavə, "Artsax" və "Avan Akademiyası" da qoşulub.
Qeyd edək ki, Ermənistanla müqayisədə, Azərbaycan Premyer Liqası ardıcıl 2 mövsümdür 8 komandanın iştirakı ilə keçirilir. I Divizionda isə artıq 10 komandanın iştirak edəcəyi təsdiqlənib. Üstəlik, Azərbaycanda əvəzedicilərin yarışı da keçirilir.
