Futbol üzrə Azərbaycan Premyer Liqasında VI turun daha 2 oyunu keçirilib. Sportnet.az-ın məlumatına görə, liderliyini geri qaytarmaq istəyən "Zirə" "İnter"lə üz-üzə gəlib.
Görüş 1:1 hesablı heç-heçə ilə yekunlaşıb. Hesabı 21-ci dəqiqədə qonaq komandanın futbolçusu Sertan Taşkın açıb. Lakin 43-cü dəqiqədə Zaur Svanadzenin baş məşqçi olduğu kollektiv İlkin Qırtımovun qırmızı vərəqə alması səbəbindən azlıqda qalıb. "Zirə" say üstünlüyündən ikinci hissədə yararlanıb. 67-ci dəqiqədə Yovan Krneta bərabərlik qolunu vurub. Bununla da xallarını 14-ə çatdıran baş məşqçi Ayxan Abasovun komandası 2-ci pillədə qalıb. 8 xala malik "İnter" isə 4-cüdür.
Günün ilk oyununda isə "Səbail" "Kəpəz"ə 1:0 hesabı ilə qalib gəllib. Yeganə qolu 60-cı dəqiqədə Elman Taqayev vurub. Beləliklə, xallarını 6-ya çatdıran "Səbail" 6-cı pillədə möhkəmlənib. "Kəpəz" isə 1 xalla sonuncudur.
Qeyd edək ki, turun açılış oyununda "Qarabağ" "Sumqayıt"ı darmadağın edib - 4:1. Son oyun isə sentyabrın 24-də "Qəbələ" ilə "Neftçi" arasında keçiriləcək.
Azərbaycan Premyer Liqası, VI tur
23 sentyabr
17:30. "Səbail” - "Kəpəz” - 1:0
Qol: Elman Taqayev, 60
Hakimlər: Rəhim Həsənov, Zeynal Zeynalov, Cavanşir Yusifov, Rauf Cabbarov
AFFA nümayəndəsi: Məmmədəli Məmmədov
Hakim-inspektor: Fazil Mürşüdov
"Dalğa Arena”
20:00. "Zirə” – "İnter” - 1:1
Qollar: Yovan Krneta, 67 - Sertan Taşkın, 21
Qırmızı vərəqə: İlkin Qırtımov, 43 ("İnter")
Hakimlər: İnqilab Məmmədov, Yaşar Abbasov, Nahid Əliyev, Ramil Diniyev
AFFA nümayəndəsi: Zamiq Hüseynov
Hakim-inspektor: Əhmədağa Cabbarov
Zirə İdman Kompleksinin stadionu
-------------------------------------------------
Azərbaycan Premyer Liqasında bu gün VI turun daha 2 oyunu keçiriləcək. Sportnet.az-ın məlumatına görə, qarşılaşmalar Bakının Mərdəkan və Zirə qəsəbələrində baş tutacaq.
Əvvəlcə debütant "Səbail" autsayder "Kəpəz"i qəbul edəcək. Gəncə təmsilçisi qalib gəlsə, xallarını 4-ə çatdıracaq və 3 xalla 6-cı pillədə qərarlaşmış "Səbail"i də üstələyəcək. Şahin Diniyevin baş məşqçi olduğu kollektiv həm də ilk qələbəyə imza atacaq. Ehtiyatda bir oyunu qalan Samir Abasovun komandası isə xal qazansa belə, mövqeyini dəyişməyəcək, yalnız 5-ci pillədəki "Sumqayıt"la xal fərqini minimuma endirəcək. Onu da qeyd edək ki, iki komanda ilk dəfə üz-üzə gələcək.
Bu görüşün ardından "Zirə" "İnter"i sınağa çəkəcək. Meydan sahibləri yalnız qələbə təqdirində, xallarını 16-ya çatdıraraq, liderliyi geri qaytaracaqlar. 7 xala malik "İnter" isə 4-cü pillədə möhkəmlənmək üçün yalnız qələbə qazanmalıdır. İndiyədək 2 komanda 8 dəfə üz-üzə gəlib. Bunların 1-də "Zirə", 1-də "İnter" qalib gəlibsə, 6 matç heç-heçə ilə yekunlaşıb. Topların nisbəti də bərabərdir - 6:6. Son 4 oyunda eyni – 1:1 hesablı heç-heçə qeydə alınıb. "İnter” 6 matçdır meydanı qolsuz tərk etmir. Komandalardan heç biri indiyədək səfərdə qalib gəlməyib. Beləliklə, bu gün "Zirə" "quru" hesabla qələbə qazansa, "bankirlər"in seriyası qırılacaq, qələbə və top fərqindəki tarazlıq pozulacaq.
Qeyd edək ki, ilk oyun günündə "Qarabağ" "Sumqayıt"ı darmadağın edib - 4:1. Turun son matçı isə sentyabrın 24-də "Qəbələ" ilə "Neftçi" arasında keçiriləcək.
