"Qızım burada dərsə gedir. Onun təhsili dekabrın 15-də başa çatacaq. Bu səbəbdən, biz həmin tarixədək Bakıda olacağıq".
Sportnet.az xəbər verir ki, bunu Azərbaycan milli komandasının sabiq baş məşqçisi Robert Prosineçki "Ekipa 24" nəşrinə açıqlamasında deyib. 48 yaşlı mütəxəssis yığmadan gedişi ilə bağlı bütün sənədləşmə işlərini yoluna qoyduqlarını bildirib. O, gülərək, hazırda işsiz olduğunu vurğulayıb. Prosineçki hazırda Sloveniya milli komandasına rəhbərlik etmə variantının olduğunu söyləyib: "Bəli, bu, doğrudur. Gələn həftə təkliflərlə tanış olacaq, daha sonra Sloveniya Futbol İttifaqının prezidenti Radenko Miyatoviçlə görüşəcəyəm".
Qeyd edək ki, Azərbaycan millisinin baş məşqçi postunda Robert Prosineçkini Qurban Qurbanov əvəzləyib. Prosineçki ilə dekabrda başa çatacaq müqavilənin müddəti uzadılmayıb.
