"Kəpəz”in əvəzedici heyətində və 19 yaşadək futbolçulardan ibarət komandasında məşqçi dəyişiklikləri baş verib. Sportnet.az-ın klubun rəsmi saytına istinadən məlumatına görə, əvəzedici heyətin baş məşqçisi Azər Məmmədov, köməkçisi Vasif Vəliyev, U-19 komandasının baş məşqçisi Ceyhun Əhmədov, köməkçisi Fuad İsmayılov ilə yollar ayrılıb.
Əvəzedicilərin baş məşqçi vəzifəsi Ceyhun Tanrıverdiyevə tapşırılıb. Mətləb Məmmədov onun köməkçisi təyin olunub. Vaxtilə "Kəpəz”in şərəfini qorumuş hər iki mütəxəssis əvvəllər də Gəncə klubunda çalışaraq aşağı yaş qrupları üzrə komandalarda işləyiblər. Tanrıverdiyev 2015/2016-cı illər mövsümündə U-14, Məmmədov isə 2015/2016-cı illərdə U-15, növbəti il U-16 komandasının baş məşqçisi olub.
"Kəpəz”in U-19 komandasının baş məşqçi postuna Anar Kələntərov gətirilib. İlqar Hüseynov onun köməkçisi olub. Gəncə futbol məktəbinin yetirməsi kimi ayrı-ayrı dövrlərdə "Kəpəz”in şərəfini qorumuş sabiq yarımmüdafiəçilərdən Kələntərov doğma klubunda iş təcrübəsinə malikdir. O, 2014/2015-ci illər mövsümündə əsas komandada məşqçi köməkçisi, eləcə də aşağı yaş qruplarında baş məşqçi çalışıb. İlqar Hüseynov isə ilk dəfə doğma klubunda məşqçilik fəaliyyətinə başlayıb.
