Türkiyənin "Samsunspor" klubu "Kəpəz"lə keçirdiyi yoxlama oyunundan sonra cəzalanıb. Sportnet.az-ın məlumatına görə, buna Ərzurumdakı təlim-məşq toplanışı zamanı baş tutmuş qarşılaşmaya klubun hakimləri özbaşına təyin etməsi səbəb olub.
2017-ci il iyulun 20-də keçirilmiş görüş "Samsunspor"un qələbəsi ilə yekunlaşıb - 2:1. Qaydalara əsasən, oyuna hakim təyinatı üçün Türkiyə Futbol Federasiyasına müraciət edilməli idi. Lakin samsunlilar bu tələbə əməl etmədikləri üçün 7500 lirə (3500 manat) cərimələnib.
Lakin "Samsunspor" cəzadan dərs almadan ötən gün "Atakum Bələdiyyəspor"la yoxlama matçında idarəçiliyi artıq karyerasını bitirmiş Ali Gürlerə həvalə edib.
