Azərbaycan milli komandasının baş məşqçisi Qurban Qurbanov yanvarın 30-da Moldova yığması ilə yoldaşlıq görüşünə dəvət etdiyi 24 futbolçudan 11-ni Belarus və Makedoniya ilə oyunlara çağırmayıb.
Sportnet.az-ın məlumatına görə, bunlardan 6-sı - Əfran İsmayılov, Rahid Əmirquliyev, Mahir Mədətov, Ramil Şeydayev, Abbas Hüseynov və Şahrudin Məhəmmədəliyev "Qarabağ"ı təmsil edir. İsmayılovla Əmirquliyevin hazırda lazımi formada deyil, qalan 4 oyunçunun isə 21 yaşadək futbolçulardan ibarət yığmaya çağırılacaqlarını güman etmək olar.
"Neftçi" yenə millidə 6 futbolçu ilə təmsil olacaq. Sadəcə, bu dəfə Məhəmməd Mirzəbəyov və Anton Krivotsyuku Səlahət Ağayevlə Namik Ələsgərov əvəzləyib.
"Qəbələ"dən Cavid Hüseynovla Təmkin Xəlilzadə dəvət almadığı halda, Asif Məmmədov və Ürfan Abbasova dəvət göndərilib.
"Sumqayıt"dan ötən toplanışa cəmi 2 futbolçu çağırılmışdısa, bu dəfə Bəhlul Mustafazadə kənarda qalıb. Onun U-21 yığmasına yollanacağı gözlənilir. Əvəzində Tural Axundov, Rəşad Eyyubov və Amil Yunanova dəvət gəlib.
"Keşlə" yenə millidə qapıçı Kamran Ağayevlə təmsil olunacaq. Ötən heyətlə müqayisədə "Səbail"dən Rahil Məmmədov, "Kəpəz"dən isə Şəhriyar Rəhimov yığmaya çağırılıb.
Beləliklə, Topaz Premyer Liqasındakı 8 klubdan 7-si milliyə oyunçu göndərəcək. Yalnız "Zirə"ni bu dəfə də heç kim təmsil etməyəcək.
Digər tərəfdən, legionerlərdən bu dəfə Pavel Paşayevlə yanaşı, Araz Abdullayev və Dmitri Nazarov da millinin hazırlıq prosesinə qatılacaq.
Azərbaycan millisinin heyəti:
Qapıçılar: Kamran Ağayev ("Keşlə"), Rəşad Əzizli ("Neftçi"), Səlahət Ağayev ("Neftçi")
Müdafiəçilər: Maksim Medvedev ("Qarabağ"), Elvin Yunuszadə ("Qarabağ"), Ruslan Abışov ("Neftçi"), Ürfan Abbasov ("Qəbələ"), Rahil Məmmədov("Səbail"), Tural Axundov ("Sumqayıt")
Yarımmüdafiəçilər: Qara Qarayev ("Qarabağ"), Coşqun Diniyev ("Qarabağ"), Riçard Almeyda("Qarabağ"), Namik Ələskərov ("Neftçi"), Rəhman Hacıyev ("Neftçi"), Emin Mahmudov ("Neftçi"), Asif Məmmədov ("Qəbələ"), Cavid İmamverdiyev ("Sumqayıt"), Rəşad Eyyubov ("Sumqayıt"), Şəhriyar Rəhimov ("Kəpəz"), Araz Abdullayev ("Anortosis", Kipr), Pavel Paşayev ("Oleksandriya”, Ukrayna), Dimitri Nazarov"Erzgebirge Aue” (Almaniya)
Hücumçular: Ruslan Qurbanov ("Qəbələ"), Amil Yunanov ("Sumqayıt").
