"Sumqayıt" Futbol Klubu ilə "Kapital Bank" Açıq Səhmdar Cəmiyyəti arasındakı əməkdaşlıq müqaviləsinin müddəti uzadılıb.
Sportnet.az klubun rəsmi saytına istinadən verdiyi məlumata görə, müqaviləyə uyğun olaraq, Sumqayıt şəhərində SOCAR-ın inşa etdirdiyi kompleks daha bir il müddətinə "Kapital Bank Arena” adlandırılacaq. Bu müddətdə adıçəkilən Bank stadionda özünün reklam materiallarının yerləşdirilməsində müstəsna hüquqlara malik olacaqdır. Bundan başqa, Kapital Bank ASC ilə "Sumqayıt" FK bu bir il ərzində müxtəlif ictimai aksiyalar həyata keçirəcək və "Sumqayıt" FK-nın oyun geyimlərində (əsas və əvəzedici komanda) "Kapital Bank"a məxsus əmtəə nişanları yerləşdiriləcək.
Bu müddət ərzində Sumqayıt məktəbliləri üçün "Yay Futbol Düşərgəsi" və "Futbol Sağlam Həyat" layihələri də davam edəcək. 3 ildir davam edən "Futbol və Sağlam Həyat" layihəsində 2500 məktəbli, "Yay Futbol Düşərgəsi" layihəsində isə 300 məktəbli iştirakçı qismində olub.
Qeyd edək ki, "Kapital Bank" Açıq Səhmdar Cəmiyyəti ilə "Sumqayıt" Futbol Klubu arasında əməkdaşlıq 2014-cü ildən davam edir.
