"Neftçi"nin prezidenti Kamran Quliyev klubun baş seleksiyaçısı vəzifəsində ayrılan Kamal Quliyevin ittihamlarına münasibət bildirib.
Sportnet.az-ın məlumatına görə, klub rəsmisi sabiq futbolçu ilə yollarının ayrılmasına müqavilə müddətinin bitməsini səbəb göstərib. O deyib ki, hər hansı başqa səbəb axtarmağa gərək yoxdur: "Neçə ildir futboldayam. Ünvanıma nə qədər söz danışılsa da, cavab verməmişəm. Amma ağdan qaranı seçmək lazımdır. Bir var müqavilənin bitməsi, bir də var insanın işdən uzaqlaşdırılması. İnsanın müqaviləsi başa çatıbsa, onun qalıb-qalmaması sırf rəhbərliyin qərarından asılıdır. Kamal Quliyevdən başqa bir neçə əməkdaşımızın da müqaviləsi başa çatmışdı. Biz onunla vidalaşmalı olduq. Burada hansısa səbəb axtarmağa ehtiyac yoxdur".
Klub rəsmisi kollektivdaxili məsələləri kənara çıxarmaq fikrində olmadıqlarını da əlavə edib: "Bizim öz mətbəximiz var. Buradan kənara heç nə çıxrmır. Qərar mənimlə Kamal Quliyev deyil, "Neftçi" ilə Kamal Quliyev arasındakı məsələdir. Mütəxəssisin klubumuzda olan dövrü müqavilə müddətinin bitməsi ilə yekunlaşdı. Burada heç nə axtarmağa gərək yoxdur".
