"Sumqayıt" klubunun yeni transferləri Elvin Məmmədov və Şəhriyar Əliyev Türkiyənin Bolu bölgəsindəki toplanışı dəyərləndiriblər.
Sportnet.az-ın klubun saytına istinadən verdiyi məlumata görə, Məmmədov məşqlərin çox yaxşı keçdiyini vurğulayıb. 30 yaşlı yarımmüdafiəçi bunları söyləyib: "Təlim-məşq toplanışı çox yaxşıdır. Mənimlə birgə komandaya yeni gələn futbolçular var. Gündə iki dəfə məşq edirik. Çalışırıq ki, çempionata hazır olaq. Yoldaşlıq oyunları keçiririk. Bu matçlarda səhvlərimizi görməyə çalışırıq. Məşqçilərimiz bunu bizə göstərir. İnanıram ki, çempionata kimi hazır olacağıq və Premyer Liqada maksimum nəticə göstərəcəyik".
Mərkəz müdafiəçisi olan Əliyev də məşqlərdə səylə işlədiklərini bildirib: "Burda texniki və taktiki hərəkətlərlə məşğuluq. Çalışırıq ki, taktikanı daha da yüksəldək. Məşqlərdə günü-gündən artım hiss olunur. Əlimizdən gələni edirik ki, komanda ideal formaya düşsün. Bunun üçün hər kəs əlindən gəldiyi qədər çalışır".
Qeyd edək ki, "Sumqayıt" bu gün Türkiyə təmsilçisi "Yeni Malatyaspor"la yoxlama oyunu keçirəcək. Matç Bakı vaxtı ilə 16:45-də başlanacaq.
