"3 xal qazandığımız və 2 qol vurduğum üçün çox xoşbəxtəm. Bu, qeyri-adi hissdir".
Sportnet.az-ın məlumatına görə, bunu Kosovo yığmasının futbolçusu Donis Avdiyay UEFA Millətlər Liqasında noyabrın 20-də Azərbaycana keçirəcəkləri D Liqasının 3-cü qrupunun VI tur matçı barədə danışarkən deyib.
Hollandiyanın "Villem II" klubunda icarə əsasında çıxış edən Almaniya "Şalke"sinin hücumçusu 78 və 80-ci dəqiqələrdə vurduğu qolları daim onu dəstəkləyən atasına həsr etdiyini bildirib. 22 yaşlı forvard Azərbaycanla son oyunda ehtiyatlı olmalarının vacibliyini də vurğulayıb.
Qeyd edək ki, D Liqasının 3-cü qrupuna 5 turdan sonra 11 xalla Kosovo başçılıq edir. Azərbaycan 9 xalla 2-ci pillədə qərarlaşıb. Priştinadakı Fadil Vokkri stadionunda keçiriləcək Kosovo - Azərbaycan matçı Bakı vaxtı ilə saat 23:45-də başlanacaq. Azərbaycan millisi yalnız qələbə təqdirində C Liqasına və pley-offa yüksələcək.
