"Qarabağ" UEFA Çempionlar Liqasının II təsnifat mərhələsində cavab oyununu keçirib. Sportnet.az-ın məlumatına görə, Qurban Qurbanovun baş məşqçisi olduğu kollektiv İrlandiyanın "Dandolk" komandasını qəbul edib. "Dalğa Arena"da keçirilən qarşılaşma Azərbaycan çempionunun 3:0 hesablı qələbəsi ilə yekunlaşıb. Görüş "Qarabağ"ın hücumları ilə başlayıb. 12-ci dəqiqədə Xayme Romero Ağdam təmsilçisini hesabda önə keçirib. 76-cı dəqiqədə isə digər legioner oyunçu Ailton Silva fərqlənib. 87-ci dəqiqə isə Xayme Romero özünün ikinci qoluna imza atıb. İrlandiyadakı ilk matçda rəqibi ilə heç-heçə (1:1) edən "Qarabağ" Çempionlar Liqasında III təsnifat mərhələsinə yüksəlib. Komanda bu raundda Kiprin APOEL kollektivi ilə üz-üzə gələcək.
----------------------------------
Bu gün “Qarabağ” UEFA Çempionlar Liqasında növbəti oyununu keçirəcək.
Sportnet.az-ın məlumatına görə, Ağdam təmsilçisi II təsnifat mərhələsinin cavam matçında İrlandiyanın “Dandolk” komandasını qəbul edəcək. “Dalğa Arena”da baş tutacaq görüş saat 21:00-da start götürəcək.
Ötən həftə Dandolkdakı “Oriel Park” stadionunda keçirilmiş ilk qarşılaşmada 1:1 hesablı heç-heçə qeydə alınıb. Hesabı 4-cü dəqiqədə Mahir Emreli açsa da, Patrik Hoban 78-ci dəqiqədə bərabərlik topunu vurub. Qələbəni əldən verməsinə rəğmən, “Qarabağ”ın səfərdən sərfəli nəticə ilə döndüyünü söyləmək olar. İndi növbəti raunda vəsiqə qazanmaqdan ötrü Ağdam təmsilçisinə evdə qol buraxmamaq kifayətdir.
Qurban Qurbanovun rəhbərlik etdiyi kollektiv I raundda Albaniya çempionu “Partizani”ni mübarizədən kənarlaşdırıb. Tiranada gerçəkləşmiş ilk matçda hesab açılmasa da, Bakıdakı oyunda Filip Ozobiç və Dani Kintananın qolları “Qarabağ”ı növbəti mərhələyə daşıyıb – 2:0.
Qeyd edək ki, “Qarabağ” İrlandiya çempionunu mübarizədən kənarlaşdıracağı təqdirdə, Kiprin APOEL komandası ilə qarşılaşacaq. Ağdam təmsilçisi “Dandolk”u keçə bilməsə, Avropa Liqasının III təsnifat mərhələsində Slovakiya “Slovan”ı ilə üz-üzə gələcək.
Çempionlar Liqası
II təsnifat mərhələsi, cavab oyunu
21:00. “Qarabağ” (Azərbaycan) – “Dandolk” (İrlandiya) - 3:0
Qol: Xayme Romero, 12. 87. Ailton Silva, 76
Baş hakim: Sveyn Moen
Yan xətt hakimləri: Maqnus Lundberq və İsaak Başevkin
Dördüncü hakim: Siqurd Krinqstad (hakimlər briqadası Norveçdəndir)
Hakim-inspektor: Sabri Çelik (Türkiyə)
UEFA nümayəndəsi: Adonis Prokopiou (Kipr)
Mərdəkan. “Dalğa Arena”
