Son günlərini yaşadığımız 2019-cu ildə “Qəbələ” İdman Klubunun futbol komandaları yaşıl meydanlarda, digər növlər üzrə təmsilçiləri müxtəlif yarışlarda qüvvəsini sınayıb. Sportnet.az xəbər verir ki, klubun idmançıları komanda və fərdi yarışlarda nailiyyətlərə imza atıblar. “Qəbələ” İK-in rəsmi saytı 2019-cu ilin ən yaddaqalan 12 məqamını təqdim edir:
1. İlk kubok
“Qəbələ” tarixində ilk dəfə Azərbaycan kubokunun qalibi olub. Ümumilikdə 4-cü, ardıcıl 3-cü dəfə finalda oynayan “qırmızı-qaralar” mayın 19-da mükafata yiyələnib. Komanda Naxçıvanda baş tutan həlledici görüşdə “Sumqayıt”la qarşılaşıb. Stiven Monrozun 3-cü dəqiqədəki erkən qolu matçın taleyini həll edib. 1:0 hesabı ilə qalib gələn "qırmızı-qaralar" tarixində ilk dəfə ölkə kubokuna yiyələnib. Bu, klub tarixində 2006-cı ilin yayında I dəstənin qalibi kimi Premyer Liqaya yüksəldikdən sonra ilk tituldur.
2. “Qəbələ”dən iki çempionluq
“Qəbələ” Futbol Akademiyasının komandalarının ölkə çempionatlarındakı uğurlu çıxışları 2019-cu ildə də davam edib. AFFA-nın təşkilatçılığı ilə baş tutan liqaların 2018/2019 mövsümündə əyalət təmsilçiləri 6 mükafata yiyələnib. U-19 və U-16 çempion adına sahib çıxıb. Bu, Gənclər Liqasında çıxış edən 19 yaşadək futbolçulardan ibarət komandanın ardıcıl 2-ci, ümumilikdə 4-cü uğuru olub. U-16 Liqasında isə “Qəbələ”nin hegemonluğu aşkardır. Bu turnirdə “qırmızı-qaralar” ardıcıl 4-cü, ümumilikdə 6-cı dəfə qızıl medala yiyələnib. U-17 ilə U-15 mövsümü gümüş mükafatla yekunlaşdırıb. U-14-lə U-12-nin qazancı isə bürünc medal olub.
3. "Minsk 2019"da iki medal
Belarusun paytaxtı Minskdə keçirilmiş II Avropa Oyunlarında “Qəbələ”nin idmançıları da medallar qazanıblar. Onlar Azərbaycan yığmasının hesabına 1 qızıl və 1 gümüş medal yazdırıblar. Boksçu Alfonso Dominges (81 kq) bütün rəqiblərini məğlub edərək Azərbaycana çempionu kimi qayıdıb. O, həm də Avropa çempionatı statusu daşıyan yarışın da qalibi sayılıb. Karateçi Rafael Ağayev (75 kq) də növbəti medalını Minskdə qazanıb. Finala qədər bütün rəqiblərinə qalib gələn təcrübəli idmançı yalnız həlledici görüşdə uduzaraq gümüş mükafata sahib çıxıb.
4. Yenə Gənclər Liqasında
“Qəbələ”nin U-19 komandası avrokubokların daimi iştirakçısına çevrilməkdədir. “Qırmızı-qaralar” tarixində 3-cü, ardıcıl 2-ci dəfə UEFA Gənclər Liqasında mübarizə aparıb. Bu turnirdə 2016/2017 mövsümündə debüt edən, ötən il isə mərhələ adlayan ilk Azərbaycan klubu kimi tarixə düşən “Qəbələ” yenə Çempionlar yolunda qüvvəsini sınayıb. Komanda I mərhələdə Kiprin APOEL klubu ilə görüşüb. "Qəbələ" səfərdə heç-heçəyə nail olsa da, evdə keçirilən görüşdə uduzaraq mərhələ adlaya bilməyib.
5. Avropada 20-ci medal
Azərbaycan milli komandasının və “Qəbələ” İdman Klubunun karateçisi Rafael Ağayev Avropa çempionatlarında 20-ci medalını qazanıb. Təcrübəli idmançı buna İspaniyanın Qvadalaxara şəhərində nail olub. O, böyüklərin 54-cü Avropa çempionatında fərqlənib. 75 kq çəki dərəcəsində mübarizə aparan karateçi yarışı gümüş medalla başa vurub. 5 qat dünya çempionu qitə birinciliklərində medal sayını yubiley həddinə - 20-yə çatdırıb. Bunun 11-i qızıl, 2-si gümüş və 7-si bürüncdür.
6. Avropa Liqasında 6-cı mövsüm
“Qəbələ”nin əsas komandası artıq avrokubokların daimi iştirakçısına çevrilib. “Qırmızı-qaralar” ardıcıl 6-cı dəfə qitə miqyaslı turnirdə qüvvəsini sınayıb. Yarışa Azərbaycan Kubokunun qalibi kimi qatılan komanda UEFA Avropa Liqasında mübarizəyə II təsnifat mərhələsindən qoşulub. 2014/2015 mövsümündən bu turnirdə daim iştirak edən, iki dəfə dörd mərhələ adlamaqla qrupa yüksələn “Qəbələ” Gürcüstan “Dinamo”su ilə görüşüb. “Qırmızı-qaralar” bu dəfə Tbilisi təmsilçisini keçə bilməyib.
7. Abbasovdan çempionluq kəməri
Azərbaycanın və “Qəbələ” İdman Klubunun MMA döyüşçüsü Nəriman Abbasov “Fight Night Global” təşkilatının çempionu adına yiyələnib. O, Rusiyanın paytaxtı Moskvadakı "Mıtişi Arena"da keçirilən turnirin qalibi olub. Abbasov yüngül çəki dərəcəsində vakant olan çempionluq kəməri uğrunda görüşdə Qazaxıstan təmsilçisi Kuat Hamitovla 5 raundluq döyüşdə 48:47, 47:47, 48:47 hesabı ilə qalib gəlib. Beləliklə, çempionluq kəmərinə yiyələnən azərbaycanlı döyüşçü 2019-cu ildə fərdi mükafat da qazanıb. O, “Avand Production”un təşkilatçılığı ilə “Park İnn” otelində baş tutan tədbirdə “Caspian Awards” mükafatı ilə təltif edilib.
8. İki futbolçu rəmzi komandada
2019-cu ilin yayında 2018/2019 mövsümünün rəmzi komandası açıqlanıb. “Qəbələ” Peşəkar Futbol Liqasının tərtib etdiyi heyətdə iki oyunçu ilə təmsil olunub. Ötən mövsümdə “qırmızı-qara” formada çıxış edən hücumçu Ceyms Adeniyi və müdafiəçi Voislav Stankoviç “11-lik”də yer alıb. Buna onların mövsüm ərzində turun komandasına düşmələri səbəb olub. Adeniyi 9, Stankoviç 6 dəfə bunu bacarıb.
9. Gənclər festivalında medal
"Qəbələ" idmançıları Bakıda keçirilən XV Avropa Gənclər Yay Olimpiya Festivalında da çıxış ediblər. Klubun rayon bölməsinin yetirməsi olan 16 yaşlı cüdoçu Gülşən Bəşirova 44 kq çəkidə festivalın bürünc mükafatına yiyələnib. Bəşirova 2019-cu ildə daha bir uğuruna Qazaxıstanın Almatı şəhərində təşkil olunan yeniyetmələr arasında dünya çempionatında imza atıb. Bu yarışda 48 kq çəkidə mübarizə aparan cüdoçu komanda yarışlarında gümüş mükafata sahib çıxıb.
10. Bir ildə iki qızıl
“Qəbələ” İdman Klubunun cüdoçusu İmran Yusifov il ərzində iki mötəbər yarışın qalibi olub. 100 kq-dan çəki dərəcəsində çıxış edən idmançı Lüksemburqda keçirilən Avropa Kubokunda bütün rəqiblərinə qalib gələrək fəxri kürsünün ən yüksək pilləsinə qalxıb. O, Çexiyanın paytaxtı Praqada keçirilən gənc cüdoçular arasında Avropa Kubokunda da da eyni uğura nail olub.
11. Avropa çempionatında bürünc medal
Taekvondoçu Cavad Ağayev İspaniyanın Marina Dor şəhərində keçirilən gənclər arasında qitə birinciliyində dayanq üzərinə çıxıb. 68 kq çəki dərəcəsində mübarizə aparan Ağayev qitə çempionatında 3-cü olaraq bürünc medal qazanıb.
12. Yeni sponsor
“Qəbələ” İdman Klubu yeni sponsorla anlaşıb. Dekabrın 19-da Qafqaz City Oteldə keçirilmiş tədbirdə klubla “Jalə” Şirələri arasında sponsorluq müqaviləsi imzalanıb. “Qəbələ”nin prezidenti Fariz Nəcəfov və şirkətin Marketinq direktoru Amid Səfərov ilyarımlıq müqaviləyə imza atıblar. Anlaşmaya əsasən, "Jalə" brendi əsas komandanın oyun formasında əksini tapacaq.
