UEFA Çempionlar Liqasında 1/8 final mərhələsinin daha 2 ilk oyunu keçirilib. Sportnet.az-ın məlumatına görə, qarşılaşmalar yenə İtaliya və İngiltərədə təşkil olunub.
"Napoli" İspaniya "Barselona"sı ilə görüşdə qələbəyə yaxın olub. 30-cu dəqiqədə Napoli komandası Dris Mertensin qolu ilə önə keçib. Lakin 57-ci dəqiqədə Antuan Qrizmann bərabərlik qolunu vurub. Beləliklə, görüş 1:1 hesablı heç-heçə ilə yekunlaşıb. 89-cu dəqiqədə Arturo Vidal ardıcıl iki sarı vərəqə alaraq, "Barsa"nı azlıqda qoyub.
Avropa Liqasının son qalibi "Çelsi" isə Almaniya "Bavariya"sı ilə görüşdə darmadağın olub. İlk yarıda hesab açılmasa da, 51-ci və 54-cü dəqiqələrdə Serj Qnabri "dubl" edib. 76-cı dəqiqədə isə Robert Levandovski yekun nəticəni müəyyənləşdirib - 3:0. Üstəlik, 83-cü dəqiqədə Markos Alonso qırmızı vərəqə alaraq, "Çelsi"ni azlıqda qoyub.
Bu komandalar arasında cavab görüşləri martın 18-də keçiriləcək.
Qeyd edək ki, daha əvvəl "Tottenhem" İngiltərədə Almaniya "Leyptsiq"inə 0:1 hesabı ilə uduzub, "Atalanta" isə İtaliyada İspaniyada "Valensiya"sını darmadağın edib - 4:1. Bundan başqa, "Atletiko" İspaniyada İngiltərə "Liverpul"una 1:0, Almaniyanın "Borussiya" (Dortmund) komandası Fransa PSJ-sinə 2:1 hesabı ilə qalib gəlib. Fevralın 26-da İspaniyada "Real Madrid" İngiltərənin "Mançester Siti" komandasını, "Lion" isə Fransada İtaliya "Yuventus"unu qəbul edəcək.
----------------------------------------
Bu gün UEFA Çempionlar Liqasında 1/8 final mərhələsinin növbəti oyunları baş tutacaq.
Sportnet.az-ın məlumatına görə, ilk oyunlar çərçivəsində iki matç keçiriləcək
"Çelsi" İngiltərədə Almaniyanın "Bavariya" komandasını qəbul edəcək. Hər iki kollektiv görüşə itkilərlə çıxacaq. London təmsilçisinin aparıcı yarımmüdafiəçisi NQolo Kante zədəli olduğu üçün oyunu buraxacaq. Digər yarımmüdafiəçilər Kallum Hadson-Odoi və Kristian Pulişiç eyni səbəbdən meydana çıxa bilməyəcək. Ruben Loftus-Çikin isə qarşılaşmada iştirakı sual altındadır. Münhen təmsilçisində isə müdafiəçi Niklas Süle və yarımmüdafiəçi İvan Perişiç zədəlidir. Xavi Martinesin durumu hələ ki, bəlli deyil.
Günün digər matçı İtaliyada olacaq. "Napoli" doğma azarkeşlər önündə İspaniya "Barselona"sını qəbul edəcək. Meydan sahiblərində müdafiəçi Kalidu Kulibalinin oynamayacağı dəqiqdir. Digər müdafiəçi Elseyid Hyusay ilə hücumçular Fernando Llorente və Arkadiuş Milikin görüşdə iştirakı bilinmir.
Kataloniya təmsilçisində isə müdafiəçisi Jordi Alba, yarımmüdafiəçi Serxio Roberto, hücumçular Luis Suareslə, Usman Dembele zədəlidir.
Bu komandalar arasındakı cavab görüşləri martın 18-də keçiriləcək.
Çempionlar Liqası
1/8 final mərhələsi, ilk oyunlar
25 fevral
24:00. "Çelsi" (İngiltərə) - "Bavariya" (Almaniya) - 0:3
Qollar: Serj Qnabri, 51; 54. Robert Levandovski, 76
Qırmızı vərəqə: Markos Alonso, 83 ("Çelsi")
Baş hakim: Klement Turpin (Fransa)
"Stamford Bric" stadionu
24:00. "Napoli" (İtaliya) - "Barselona" (İspaniya) - 1:1
Qollar: Dris Mertens, 30 - Antuan Qrizmann, 57
Qırmızı vərəqə: Arturo Vidal, 89 ("Barselona")
Baş hakim: Feliks Brıx (Almaniya)
"San Paolo" stadionu
