Türkiyənin Antalya şəhərində təlim-məşq toplanışında olan Azərbaycan milli komandası, həmçinin 21 və 16 yaşadək futbolçulardan ibarət yığmalarımız bu gün və fevralın 25-də keçirəcəkləri yoldaşlıq oyunlarına qara sarğı ilə çıxacaqlar. Sportnet.az-ın məlumatına görə, yığmaların bu addımı Xocalı faciəsinin 23-cü ildönümü ilə əlaqədardır.
Millimiz bu gün Ukraynanın "Şaxtyor” (Donetsk) klubu ilə qüvvəsini sınayacaq. U-16 yığmamız isə Belarusun U-17 komandası ilə qarşılaşacaq.
Qeyd edək ki, 21 yaşadək futbolçulardan ibarət Azərbaycan yığması fevralın 25-də Qananın müvafiq yaş qrupuna aid komandası, U-16 isə Norveçin "Konnerud” klubunun U-17 komandası ilə yoldaşlıq oyunu keçirəcək.
