UEFA Çempionlar Liqasında 1/8 final mərhələsinin daha 2 cavab oyunu keçirilib.
Sportnet.az-ın məlumatına görə, bununla da 1/4 finalın növbəti iştirakçıları bəlli olub.
Gecənin prinsipial qarşılaşmasında Fransa PSJ-si İspaniyada "Real Madrid"lə qarşılaşıb. İlk matçda Paris təmsilçisi rəqibinə 1:0 hesabı ilə qalib gəlsə də, ikinci görüşdə bu üstünlüyünü qoruya bilməyib. Səfərdə 1:3 hesabı ilə uduzan qonaqlar turnirlə vidalaşıb.
Oyunda hesabı 39-cu dəqiqədə PSJ-nin hücumçusu Kilian Mbappe açıb. Lakin 61-ci, 76-cı və 78-ci dəqiqələrdə fərqlənən Kərim Benzema həm het-trikini, həm də növbəti mərhələyə vəsiqəni rəsmiləşdirib.
Gecənin digər matçında İngiltərənin "Mançester Siti" klubu evdə Portuqaliya "Sportinq"ini sınağa çəkib. Səfərdəki ilk görüşdə 5:0 hesablı qələbə qazanan "şəhərlilər" evdə qolsuz heç-heçə edərək, 1/4 finala adlayıb.
-----------------------------------------
Bu gün UEFA Çempionlar Liqasında 1/8 final mərhələsinin daha 2 oyunu keçiriləcək. Sportnet.az-ın məlumatına görə, qarşılaşmalar Bakı vaxtı ilə saat 00:00-da başlayacaq.
Gecənin prinsipial qarşılaşmasında Fransa PSJ-si İspaniyada "Real Madrid"in qonağı olacaq. İlk matçda Paris təmsilçisi 1:0 hesablı qələbə qazanıb.
Meydan sahiblərinin heyətində Ferlan Mendi və Kazemiro cəzalı olduqları üçün oynamayacaqlar. Zədələrini yenicə sağaltmış Toni Kroos və Federiko Valverdenin isə meydana çıxmaları sual altındadır. Qonaqlarda Serxio Ramos və Leven Kürzava zədə səbəbindən oynamayacaqlar. Əşrəf Hakimi, Ander Errera və Kilian Mbappenin oyunda iştirak edib-etməyəcəyi dəqiq bilinmir.
Gecənin digər matçında İngiltərənin "Mançester Siti" klubu evdə Portuqaliya "Sportinq"ini sınağa çəkəcək. Səfərdəki ilk görüşdə 5:0 hesablı qələbə qazanan "şəhərlilər" cütün taleyini demək olar ki, həll ediblər.
Qarşılaşma öncəsi Mançester təmsilçisinin heyətində Kayl Uoker cəzalı, Ruben Diaş zədəlidir. Natan Akenin durumuna isə oyun günü aydınlıq gələcək. Lissabon təmsilçisində isə Joau Palinya, Pedru Qonsalveş və Daniel Braqansa zədə, Mateus Nunyes cəza səbəbindən meydana çıxmayacaq.
UEFA Çempionlar Liqası, 1/8 final
Cavab oyunları
9 mart
00:00. "Real Madrid" (İspaniya) - PSJ (Fransa) - 3:1
Qollar: Kərim Benzema, 61; 76; 78 - Kilian Mbappe, 39
Baş hakim: Denni Makkeli (Niderland)
İlk oyun - 0:1
00:00. "Mançester Siti" (İngiltərə) - "Sportinq" (Portuqaliya) - 0:0
Baş hakim: Halil Umut Meler (Türkiyə)
İlk oyun: 5:0
Qeyd edək ki, daha əvvəl İngiltərənin "Liverpul" və Almaniyanın "Bavariya" komandaları 1/4 finala yüksəlib.
