UEFA Çempionlar Liqasında 1/8 final mərhələsinə start verilib.
Sportnet.az-ın məlumatına görə, ilk oyun günündə 2 qarşılaşma baş tutub.
Fransada PSJ-nin qonağı olan Almaniya "Bavariya"sı minimal hesablı qələbə qazanıb. Yeganə qolu 53-cü dəqiqədə Kinqsli Koman vurub. Əsas vaxtın sonuna əlavə olunmuş 2-ci dəqiqədə qonaqların müdafiəçisi Benjamin Pavar ikinci sarı vərəqəni alaraq meydandan qovulub.
Gecənin digər oyununda isə "Milan" İtaliyada İngiltərə "Tottenhem"inə eyni hesabla qalib gəlib. Meydan sahiblərindən 7-ci dəqiqədə Brahim Dias fərqlənib.
Qeyd edək ki, komandalar arasında cavab oyunları martın 8-də keçiriləcək.
----------------------------------------
Bu gün UEFA Çempionlar Liqasında (ÇL) pley-off mərhələsinə start veriləcək. Sportnet.az-ın məlumatına görə, 1/8 finalın ilk iki oyun keçiriləcək.
Mərhələnin ən diqqətçəkən görüşü Parisdə baş tutacaq. 2019/2020 mövsümünün finalçıları Fransa PSJ-si ilə Almaniya təmsilçisi “Bavariya” birincilərin meydanında üz-üzə gələcəklər. 2023-cü ildə heç də yaxşı nəticələr göstərməyən PSJ-də aparıcı futbolçular Neymar, Kilian Mbappe və Lionel Messinin durumları qeyri-müəyyən idi. Lakin hər üç hücumçunun böyük ehtimalla meydanda olacağı açıqlanıb.
Əvəzində “Bavariya” “erkən final”a ciddi itkilərlə çıxacaq. Uzunmüddətli zədədən əziyyət çəkən qapıçı Manuel Noyer və vinger Sadio Mane münhenlilərə kömək edə bilməyəcəklər. Həmçinin, Lukas Ernandes və Nussair Mazraui də zədəlidirlər.
Paralel keçən qarşılaşmada İtaliya çempionu “Milan” İngiltərə təmsilçisi “Tottenhem”i qəbul edəcək. İlk duel öncəsi hər iki komandanın heyətində ciddi itkilər var. “Milan”da Serjinyo Dest, İsmael Bennaser, Alessandro Florensi, Zlatan İbrahimoviç, Maykl Menyan və Fikayo Tomorinin yoxluğunu vurğulamaq lazımdır.
“Tottenhem”də isə Rodriqo Bentankur, İv Bissuma, Pyerr-Emil Hoybyerq, Uqo Lyoris və Rayan Sessenyon müxtəlif səbəblərdən baş məşqçi Antonio Kontenin sərəncamında olmayacaqlar.
Qeyd edək ki, 1/8 final mərhələsinin “Brügge” (Belçika) – “Benfika” (Portuqaliya) və “Borussiya” (Dortmund, Almaniya) – “Çelsi” (İngiltərə) oyunları fevralın 15-də, digər matçlar isə bir həftə sonra keçiriləcək.
Çempionlar Liqası
1/8 final, ilk oyunlar
14 fevral
00:00. PSJ (Fransa) – “Bavariya” (Almaniya) - 0:1
Qol: Kinqsli Koman, 53
Qırmızı vərəqə: Benjamin Pavar, 90+2 ("Bavariya")
Baş hakim: Maykl Oliver (İngiltərə)
Paris. “Park De Prens” stadionu
00:00. “Milan” (İtaliya) – “Tottenhem” (İngiltərə) - 1:0
Qol: Brahim Dias, 7
Baş hakim: Sandro Şerer (İsveçrə)
Milan. “San Siro” stadionu
