"Gəncədə "Kəpəz" üzərində qələbə qazanmaq bizim üçün çox vacibdir. Çünki qələbə sayəsində komandanın özünəinamı geri qayıdacaq. Biz pis oynamırıq, sadəcə, son matçlarda bəxtimiz gətirmir. Gəncədə qələbə qazanmaq istəyirik". Bu sözləri Sportnet.az-a açıqlamasında "Sumqayıt”ın forvardı Amil Yunanov deyib.
"Gənclik şəhəri” təmsilçisinin hücumçusu komandasının avrokuboklara düşə biləcəyi inamının azalmadığını bildirib: "Biz avrokuboklar üçün sona kimi vuruşacağıq. Şansımız da qalıb. Sadəcə, qarşıdakı oyunlarda xal itirməməliyik. Komandam üçün qol vurmağa, meydanda əlimdən gələni etməyə çalışıram. Ümidvaram ki, hər şey daha yaxşı alınacaq”.
Yunanov Gəncə stadionunun qazonunun ağır olduğunu söyləsə də hər iki komanda üçün şərtlərin eyni olacağını vurğulayıb.
Qeyd edək ki, Premyer Liqanın XXIII turunun "Kəpəz" - "Sumqayıt" matçı martın 18-də Gəncə şəhər stadionunda baş tutacaq. Oyun saat 16:00-da start götürəcək.
