Bakının "İnter" klubu Albaniya "Laçi"sinin futbolçusu Argend Mustafanın Azərbaycana gəlişi üçün viza verilməməsi ilə əlaqədar bəyanat yayıb. Sportnet.az-ın məlumatına görə, "bankirlər" kosovolu oyunçunun ölkəmizə buraxılmamasına dair xəbərləri təkzib edib.
Klub bəyan edib ki, Azərbaycan Respublikasının Kosovonu müstəqil dövlət kimi tanımadığından, Mustafaya viza verilməsinin qeyri-mümkünlüyü barədə "Laçi" rəhbərliyinə rəsmi məlumat göndərilib: "Bəzi saytlarda qeyd edildiyi kimi, "Laçi" klubunun rəhbərliyi Argend Mustafanın Azərbaycana buraxılmayacağı xəbərini İstanbul hava limanında almayıb. AFFA da kosovolu futbolçu ilə bağlı UEFA-nı məlumatlandırıb. Klubumuz qonaq komandanın Azərbaycana gəlməsi üçün zəruri olan bütün tələbləri yerinə yetirib".
Qeyd edək ki, "İnter" və "Laçi" arasındakı Avropa Liqasının I təsnifat mərhələsinin cavab görüşü sabah saat 21:00-da başlanacaq. Oyun "İnter Arena"da keçiriləcək.
