"Tiraspol"un baş məşqçisi: "Əsas məqsəd qol buraxmamaq, öz şanslarımızdan yararlanmaqdır"

Moldovanın "Tiraspol” klubunun baş məşqçisi Vlad Qoyan və komandanın hücumçusu Georgi Boqyu mətbuat konfransı keçiriblər. Sportnet.az-ın klubun rəsmi saytınas istinadən məlumatına görə, onlar Azərbaycanın "İnter" klubu ilə Avropa Liqasının I təsnifat mərhələsinin oyunu barədə danışıblar.
 

- Vlad Qoyan: "İnter” bacarıqlı futbolçulardan qurulan yaxşı komandadır. Onlar təşkilatlanmış müdafiə qurmağı bacarırlar. Topu ələ keçirdikdən sonra sürətli hücumlar və əks-hücumlar qurmaqları da var. Lazım olanda topa da nəzarət etməyə qadirdirlər. İlk növbədə qapımızın toxunulmazlığını qorumalıyıq. İmkan daxilində hücumda da şansımızdan yararlanmalıyıq. Ümid edirəm ki, azarkeşlərimiz oyuna gələcək və son dəqiqəyədək bizi dəstəkləyəcəklər. Müsbət nəticə əldə etmək üçün bizə köməkləri dəyəcək.

- Georgi Boqyu: Onu deyə bilərəm ki, ilk oyun çox yaxşı keçəcək. Təşəbbüsə yiyələnməyə çalışacağıq, 1-ci nömrə ilə oynayacağıq. İlk oyunu evdə keçiririk, müsbət nəticə əldə etməliyik.

-Georgi, Siz Azərbaycan çempionatında oynamısınız. İki ölkə arasında fərq barədə danışardınız. Ümumiyyətlə, Azərbaycan komandasına qarşı necə oynamaq lazımdır?

-Deməzdim ki, böyük fərq var. Hər iki çempionatda müxtəlif komandalar var. Elələri var ki, topla oynamağı daha çox sevir, bəziləri isə oyunu müdafiədən qururlar. Bildiyimə görə, "İnter” müdafiədən oynamağa üstünlük verir.

-Bunu nəzərə alsaq, sabah "Tiraspol”un 1-ci nömrə ilə oynaması realdır?

-Vlad Qoyan: Biz həmişə 1-ci nömrə ilə oynamağa çalışırıq. Aydın məsələdir elə anlar olacaq ki, öz cərimə meydançamızın yaxınlığında və daxilində, meydanın bizə aid hissəsində müdafiə olunmalı olacağıq. Deyə bilmərəm, onlar bütün oyunu müdafiədən quracaqlar, ya yox. Bəli, rəqib müdafiə olunmağı bacarır. Ancaq topa nəzarət etməyi də bacarırlar. Düşünürəm ki, bəzi epizodlarda topu ələ keçirib, sürətli hücum quracaqlar. Ayndın məsələdir ki, bəzən oyunun tempi düşəcək.

-Ötən ilin təcrübəsini nəzərə alaraq, cütlüyün taleyini ilk oyunda həll etməyə çalışacaqsınızmı?

-Vlad Qoyan: Fiziki cəhətdən 100 faiz hazır deyilik. Psixoloji, taktiki və texniki baxımdan tam hazırıq. Oyunun əvvəlində irəli atılsaq, hər iki hissəyə gücümüz çatmaya bilər. Əlbəttə, evdə daha yaxşı oynamalıyıq. Amma əsas məqsəd qol buraxmamaq, öz şanslarımızdan istifadə etməkdir. Ötən il evdə qol buraxdıq, təkrar görüşdə bütün qüvvələri səfərbər edərək, hücuma atıldıq. Belədə isə, rəqib əks-hücumda xeyli qol imkanı əldə edə bilər. Demirəm ki, ehtiyatlı oynayacağıq, ancaq ilk növbədə müdafiədə diqqətli oynamalıyıq.

-Yeni transferlər Avropa Liqasına hesablanıb? Komandaya cəlb olunan bütün futbolçulara ümid edirsiniz?

-Vlad Qoyan: Bəli, 1 ay vaxtımız var idi. Sıralarımıza qatılan futbolçular komandamızı gücləndirdi, hesab edirəm ki, ötən mövsümdəkindən daha güclüyük. Heyətimizdə olan köhnə futbolçuların da səviyyələri artıb.

-"Tiraspol” "İnter”i keçsə İsveçin "Elfsborq” komandası ilə qarşılaşcaq. Həmin oyun barədə düşünürsünüz, yoxsa diqqətinizi ancaq Azərbaycan klubuna yönəltmisiniz?

-Vlad Qoyan: İlk növbədə ancaq sabah baş tutacaq görüş barədə düşünürəm. Daha sonra Bakıda keçiriləcək oyun haqda fikirləşməyə başlayacağam. "İskra-Stal”ın məşqçisi olduğum dövrdə qarşlaşdığımız "Elfsborq”la indiki tam fərqli komandalardır.

-Georgi, Azərbaycanda oynadığız dövrdən bəri "İnter” çoxmu dəyişib?

-Georgi Boqyu: Deyə bilmərəm, heyətlərini nəzərdən keçirməmişəm. Sadəcə, komandamızla oyunlarını təhlil etmişik.

-Vlad Qoyan: Bu komandanın 7 və ya 8 oyununa baxmışam. Bundan sonra futbolçularıma onlara qarşı necə oynamağın yolunu göstərmişəm. Bütün hallarda rəqib barədə kifayət qədər məlumat toplaya bilmişik. Yəqin ki, onlar da istədikləri informasiyanı əldə edə biliblər.