Ukraynanın "Dinamo" (Kiyev) komandasının Azərbaycan Kubokunun sahibi "Neftçi" ilə Avstriyada yoxlama görüşü keçirməsi öncədən planda olmayıb. Sportnet.az-ın Kiyev təmsilçisinin rəsmi saytına istinadən məlumatına görə, "Dinamo" iyulun 3-də Çexiya "Sparta"sı ilə üz-üzə gəlməli imiş.
Lakin tərəflər bəzi səbəblərdən planlaşdırılan matçdan imtina etməli olub. Bildirilir ki, Praqa komandası ilə qarşılaşma İtaliyanın Ştertsinq şəhərində nəzərdə tutulubmuş. Lakin həmin şəhərdəki stadionun bu görüşü qəbul etməyə hazır olmadığı üzə çıxıb. Avstriya ərazisində isə "Sparta" azarkeşlərinin ötənilki toplanış zamanı davranışları üzündən matçları keçirə bilmir.
Oyunu İtaliyanın digər şəhərində keçirmə variantı da olub. Lakin lazımi infrastruktura malik stadiona çatmaq üçün "Dinamo" qaldığı oteldən uzun yol qət etməli imiş. Bu səbəbdən, "Dinamo"nun Yenbaxdakı məşq düşərgəsi yaxınlığında məskunlaşan "Neftçi" ilə görüş keçirməsi qərara alınıb.
Qeyd edək ki, oyun bu gün Bakı vaxtı ilə saat 15:30-da başlanacaq.
