Azərbaycan milli komandasından imtina edən Eddi İsrafilovun çıxış etdiyi İspaniyanın "Mursiya" klubu III Liqaya endirilib. Sportnet.az-ın məlumatına görə, buna klubun irəli sürdüyü 2014-2015-ci il mövsümünün büdcəsinin Peşəkar Futbol Liqasının (LFP) iqtisadi və maliyyə tələblərinə cavab verməməsi səbəb olub.
Əvəzində ötən mövsüm Segundanı 19-cu pillədə başa vuran və daha aşağı liqaya enməli olan "Mirandes"in elə səviyyəcə ikinci liqada qalacağı gözlənilir. Bununla bağlı rəsmi qərarın avqustun 7-də veriləcəyi gözlənilir.
Qeyd edək ki, "Mursiya"nın futbolçusu Eddi İsrafilovun anası Elnarə İsrafilova azərbaycanlı, atası Dominqo Paskual isə anqolalıdır. İsrafilov Azərbaycan millisinin 2013-cü il mayın 25-dən 30-dək Qətərdə keçirilmiş təlim-məşq toplantısına çağırılsa da, ilkin razığına rəğmən, sonradan dəvəti qəbul etməyib. AFFA rəhbərliyi bunu 22 yaşlı hücumameylli yarımmüdafiəçinin millimizdə oynamaq üçün 500 min avro istəməsi ilə əlaqələndirib.
