"Neftçi" ilə oyuna hazırlaşmaq üçün aktiv işləyəcəyik. Komandamızın skautları öz işlərini görəcəklər. Rəqib haqda informasiya toplamalıyıq". Sportnet.az-ın məlumatına görə, bunu Serbiya "Partizan"ının baş məşqçisi Marko Nikoliç klubun rəsmi saytına açıqlamasında deyib.
35 yaşlı mütəxəssis Avropa Liqasının "pley-off" mərhələsində qarşılaşacaqları rəqiblə yanaşı, sabah start götürəcək Serbiya çempionatına hazırlaşmalarının gərəkliyini bildirib. O, Avroliqa matçınadək 2 çempionat matçına çıxmalarını yaxşı hal adlandırıb. Nikoliç əsas məqsədlərinin qrup mərhələsinə vəsiqə qazanmaqdan ibarət olduğunu bildirib: "Hədəfimizə nail olsaq, bu, bizim üçün özünəməxsus şücaət olacaq. Rəqib diqqətə layiqdir, amma keçilməz sədd deyil. Biz də "Neftçi"ni üstələmək üçün mümkün olan hər şeyi edəcəyik. Hər iki matçda rəqabətə davamlı olmaq üçün yaxşı oynamalıyıq. Səfərdə keçirəcəyimiz ilk matçda yaxşı nəticə göstərməliyik ki, Belqradda vəzifəmizin öhdəsindən gələ bilək".
Baş məşqçi 2 mövsüm öncə "Neftçi" ilə "Partizan" arasında Avropa Liqasının qrup mərhələsində keçirilmiş oyunları xatırladıb. O, Serbiya təmsilçisinin evdə 0:0, səfərdə 1:1 hesablı heç-heçə etdiyi görüşdən fərqli olaraq, bu dəfə hər iki qarşılaşmadan qalib ayrılmağa çalışacaqlarını bildirib. Nikoliç "Neftçi"nin qapıçısı Saşa Stamenkoviçlə "Partizan" futbolçuları arasında yaşanmış münaqişəyə də toxunub: "Mənim heç kiminlə problemim yoxdur. Qoy, o da öz qapısını qorusun və işini görsün. Onun vəzifəsi qapını qorumaq, bizimki isə hədəfi dəqiq nişan almaqdır".
Baş məşqçi, həmçinin püşkatma öncəsi 5 mümkün rəqibdən heç birini arzulamadığını etiraf edib. Onun fikrincə, Türkiyə təmsilçiləri hələ də güclü, Belarus komandası böyük sirrdir. Bu baxımdan, Nikoliç püşkün nəticəsini ədalətli sayıb. Gənc mütəxəssis optimist olduğunu da əlavə edib.
Qeyd edək ki, püşkə əsasən, "Neftçi" "Partizan"la ilk oyununu avqustun 21-də Bakıda, cavab görüşünü isə avqustun 28-də Belqradda keçirməlidir.
