Azərbaycan milli komandası bu gün Türkiyənin Antalya şəhərinə yola düşüb. Sportnet.az-ın məlumatına görə, səfərdə əsas, U-21 və U-16 yığma komandaları iştirak edir.
Milli komandayla yanaşı AFFA Məşqçilər Komitəsinin üzvləri - Böyükağa Hacıyev, Şahin Diniyev və Ağasəlim Mircavadov da toplanışda iştirak edəcək.
Qeyd edək ki, Antalyada keçiriləcək toplanış çərçivəsində fevralın 24-də əsas yığma komanda Ukraynanın "Şaxtyor" klubu ilə yoldaşlıq oyunu keçirəcək. Görüş "Mardan Stadium"da baş tutacaq. "Neftçi" və AZAL klublarının Premyer Liqanın III turundan təxirə salınmış oyununun keçirilməsi səbəbindən sözügedən komandaların futbolçuları bir həftə davam edəcək toplanışda iştirak etməyəcək.
