Ukraynanın "Şaxtyor" klubunun futbolçusu İvan Ordetsin Sportnet.az-a müsahibəsi
- 4 oyunda 4 qələbə qazandınız. Qarşıya qoyulan məqsədə nail olduğunuzu düşünürsünüz?
- Bəli. Biz bu təlim-məşq toplanışında yaxşı oyunlar keçirdik. Məqsədimiz yaxşı oynayaraq, Ukrayna çempionatına hazır olmaqdan ibarət idi. Hesab edirəm ki, hər şey alındı və çempionata yaxşı hazırlaşdıq.
- Son 2 gün ərzində yağışlı hava şəraiti hazırlıq prosesinizə maneçilik törətmədi?
- Meydan və drenaj sistemi yaxşı vəziyyətdə idi. Yağışa baxmayaraq, qazon qopmurdu. Yəni, havaların pisləşməsi heç kimə mane olmadı. Əksinə, bu təcrübə gələcək oyunlarımızı müxtəlif meydanlarda keçirdikdə köməyimizə gəlir.
- Azərbaycan millisi ilə oyun barədə hansı fikirdəsiniz?
- Rəqib pis komanda deyildi. Topa yaxşı nəzarət edir, pressinqdən çıxmağı bacarırdı. Futbolçuların səviyyəsi də yüksək idi. Hesab edirəm ki, bu yığmanın yaxşı gələcəyi var.
- Razısınızmı ki, Azərbaycan millisi rəqibləriniz arasında ən güclüsü idi?
- Fikrimcə, bəli. Bu toplanış zamanı ən güclü komandalardan idi.
- Bir neçə gündən sonra Ukrayna çempionatı matçında "Vorskla" ilə qarşılaşacaqsınız. Bu oyuna hansı vəziyyətdə çıxacaqsınız?
- Məncə, oyuna hazırıq. Hələ məşqlər üçün 2 günümüz də olacaq. Oyun yaxınlaşdıqca rəqibi də analiz edəcəyik. Komandamızın 100 faiz hazırlıqlı olduğunu düşünürəm.
- Azərbaycan yığmasının heyətində hansı futbolçular xoşunuza gəldi?
- İlk yarıda hücumçunuz (Namiq Ələsgərov - red.) pis deyildi. Bir də mənə tanış olan qapıçınız Andrey Popoviçi qeyd edərdim. Prinsipcə, bütün komanda pis deyildi və ilk yarını yaxşı keçirdi.
- Yeni baş məşqçi Robert Prosineçkinin işini hiss etdiniz?
- Komandada yaxşı nizam-intizamın olduğu görünür. Futbolçuların hamısı pressinq edir, geriyə qayıdırdılar. Yüksək səviyyəli komanda olduğu nəzərə çarpır.
- Yəni, komandamızın potensialı var?
- Əlbəttə, Azərbaycan yığmasının yaxşı gələcəyinin olduğunu düşünürəm.
