İtaliya milli komandasının baş məşqçisi Antonio Konte 3 futbolçunu milliləşdirmək niyyətindədir. Sportnet.az-ın "La Gazzetta dello Sport"a istinadən məlumatına görə, "Skuadra Adzurra"nın heyətinə argentinalı yarımmüdafiəçilər Franko Vaskes və Xose Mauri dəvət edilə bilərlər.
Vaskes "Palermo"da, Mauri "Parma"da çıxış edir. Eyni zamanda "Bavariya"nın Almaniyada doğulmuş 18 yaşlı yetirməsi Canluka Qaudinonun da yığmaya çağırılma variantı nəzərdən keçirilir. Hələlik onların heç biri Argentina və Almaniyanın əsas komandalarında forma geyinmədiklərindən, vətəndaşlıqlarını dəyişdirə bilərlər. Daha öncə "Palermo"nun argentinalı hücumçusu Paulo Dibala vətəndaşlığını dəyişməkdən imtina edib.
Qeyd edək ki, İtaliya və Azərbaycan milliləri AVRO-2016-nın seçmə mərhələsində eyni qrupda yer alıblar. İki komanda arasında oktyabrın 10-da Palermoda keçirilmiş oyunda meydan sahibləri qalib gəlib - 2:1. Bakıdakı qarşılaşma 2015-ci il oktyabrın 10-da olacaq.
