Sportnet.az saytının fəaliyyətə başlamasından 3 il ötür. 2014-cü ilin bu günündə İdman Araşdırmalar Mərkəzinin layihəsi kimi oxucularla görüşə gələn saytımız bütün idman növləri üzrə ölkədə və dünyada baş verən mühüm olaylar barədə xəbər və reportajlar hazırlayıb, müxtəlif mövzularda müsahibələr, araşdırmalar, təhlillər təqdim edib.
2016-cı il Rio-de-Janeyro Yay Olimpiya Oyunları, "Bakı 2015" I Avropa Oyunları, eləcə də futbol üzrə Avropa və dünya çempionatları, Azərbaycan komandalarının nüfuzlu yarışlarda çıxışları daim diqqət mərkəzində saxlanılıb. Saytımızın ildönümü hazırda davam edən IV İslam Həmrəyliyi Oyunlarına təsadüf edir.
Bu gün geniş oxucu kütləsinə malik olmağımızın əsas səbəbi operativlik və dəqiqliyi pioritet seçməyimizdir. Geridə qoyduğumuz müddət ərzində bir amal - insanların etibarını qazanmaq və qorumaq üçün çalışmışıq.
Hədəfimiz Sportnet.az-ı oxucuların zövqünə oxşayacaq, suallarına cavab tapa biləcəkləri, daim məlumat əldə edəcəkləri ünvana çevirmək olub. Saytımız bir ildən çoxdur ki, üzvü olduğu AFFA yanında Media Komitəsi tərəfindən daim layihə qalibi elan olunur. 2016-cı ildə Sportnet.az Azərbaycan İdman Jurnalistləri Assosiasiyası tərəfindən ilin idman saytı seçilib, əməkdaşlarımız müxtəlif mükafatlara, o cümlədən, Gənclər və İdman Nazirliyi tərəfindən "İlin idman jurnalisti" adına layiq görülüb.
3 il ərzində böyük yol qət etməyimizin arxasında saytımızla əməkdaşlıq edən şəxslərin gərgin əməyi durur. Məhz onların sayəsində öz dəst-xəttimizlə seçilməyə müvəffəq olmuşuq.
Lakin hələ yolun başlanğıcındayıq. Hədəflərimizi zamanın axarında böyüdərək auditoriyamızı daha da genişləndirmək istəyirik. Hazırda Sportnet.az-ın sosial şəbəkələrdəki fəallığını artırmaq istiqamətində işlər görülür.
Bir sözlə, prinsiplərimizə sadiq qalmaqla yeniliklərə açıq olan bir nəşr kimi idmanın nəbzini tutmaq üçün böyük həvəslə işləyirik.
Belə xoş gün münasibətilə hazırda Sportnet.az-da çalışan, əməkdaşlıq edən və indiyədək saytımızın uğurları üçün çalışmış bütün həmkarlarımıza bir daha təşəkkürümüzü bildirir, onları və sadiq oxucularımızı təbrik edirik...
