“İlk olaraq bildirmək istəyirəm ki, 20 Yanvar tarixinin hamımız üçün ağır gün olması səbəbindən xalqımıza başsağlığı verirəm. Oyuna hazırlaşmaq üçün kifayət qədər vaxtımız olmadı. Buna baxmayaraq, mövcud qısa zamanı səmərəli şəkildə istifadə etməyə çalışdıq və maksimum çalışaraq futbolçularımı fiziki cəhətdən oyuna hazırladıq. Futbolçularım məşqlərdə istəkli və intizamlı idilər. İnanıram ki, sabahkı oyunda da bunu nümayiş etdirəcək və baxımlı oyun göstərəcəklər.”
Sportnet.az xəbər verir ki, bunu "Qarabağ"ın baş məşqçisi Qurban Qurbanov evdə Almaniyanın "Frankfurt"ına qarşı keçirəcəkləri UEFA Çempionlar Liqasının əsas mərhələsinin VII tur matçından əvvəl mətbuat konfransında deyib.
- Rəqibdəki dəyişiklik planlarınızı pozdu?
- Düşünmək olar. Yanvardan bəri 3 oyun oynadılar. Fərqli heyət, sistemlə oynayırdılar. Ona uyğun iş aparırdıq. Bu dəyişiklik… Diqqətli olmalıyıq. Belə halla birinci dəfə deyil ki, qarşılaşırıq. Rəqib təcrübəlidi. Özünəməxsus alman intizamı var. İnanıram ki, uğurlu nəticə əldə edə bilərik.
- Rəqib Bakıya sabah gələcək. Bu üstünlük ola bilər? Hava şəraiti oyuna təsir edə bilər?
- Elə də əhəmiyyət kəsb etmir. Biz də belə etmişik. Öz proqramları belədi.
- Aleksandr Meyer “Qarabağ”a 3 qol vurub. Bunun sizin üçün əhəmiyyəti var?
- Bu dəfə qol vura bilməyəcək (gülür). Hər şəraitdə oynamağı bacarmalıyıq. İnanıram ki, uğurlu oyun olacaq.
- Bu qışda transfer olacaq?
- Gözlənti çoxdu. Alınmalıdı. Maneə olmasa, transfer olacaq.
- Montiel sabah oynaya bilər?
- Xeyli vaxt futboldan uzaq qalmışdı. Durumu pis deyil. Futbolçu elə məxluqdu ki, soruşsan, deyəcək ki, optimal formadayam. Gələndən çox əziyyət çəkib. İşinə peşəkarcasına yanaşdı. Amma hələ də onu tam hazır hesab etmirəm. 1 ildən çoxdu ki, futbol oynamırdı. Oyun təcrübəsinə ehtiyacı var. Hazırlığından razıyam. Daha yaxşı ola bilər. Məşqçi kimi çalışacam ki, daha yaxşı olsun.
- ÇL ölkə çempionatına təsir edəcək?
- Bəli. Bəzən belə oyunlardan sonra xal itkilərimiz olub. Avropada da belədi. Amma yerimizi qoruyub saxlaya bilmişik. Mane törədir. Fikrimiz bu oyunlaradı. Amma müvəqqətidi. Gedişatda köklənirik. Çətin olsa da, bu bizim işimizdi. 11 yox, 22-23 futbolçumuz var. Digər futbolçuların da üzərinə böyük məsuliyyət düşür. “İkinci heyət” deyək. İnanıram ki, utbolçuların xətrinə dəyməz. Onlar daha faydalı olur. Onlar olmasa, Avropada çıxış edə bilmərik. Gözlənilməz məğlubiyyətlər olur.
