"İmişli"nin baş məşqçisi Jorj Kaşkilya səfərdə "Turan Tovuz"la 0:0 hesablı heç-heçə etdikləri Azərbaycan Premyer Liqasının XXII tur matçından sonra mətbuat konfransı keçirib.
Sportnet.az-ın məlumatına görə, portuqaliyalı mütəxəssis əvvəlcə oyun barədə fikirlərini bölüşüb:
- Öz oyunçularımı təbrik edirəm. Taktiki cəhətdən yüksək səviyyədə çıxış etdik. "Turan Tovuz" son matçlarda qalib gəlir, psixoloji durumları üstündür. Amma onlara qarşı yaxşı mübarizə apardıq. Çətin oyun alındı. "Turan Tovuz" avrokuboklarda oynamaq istəyir. Çox intensiv oyun gedirdi. Taktiki cəhətdən oyunçularımdan razıyam. Rəqibin futbolçuları fiziki cəhətdən güclüdür. Onlar bu sarıdan bizdən güclü idilər. Amma oyun quruluşunda bizim orta xətt rəqibin yarımmüdafiəsinin qarşısını ala bilirdi. Oyunumuzdan razıyıq. Birinci hissədə 1-2 epizod yaratdıq. İkinci hissədə çətinlik çəkirdik. "Turan Tovuz"un mərkəz müdafiəçiləri təcrübəli və güclüdürlər. Rəqibin gücünü nəzərə alaraq, əlimizdən gələni edirdik. Biz hücumumuza daha çox diqqət yetirəcəyik. Meydana qələbə üçün çıxmışdıq. Amma oyunun gedişatından razıyıq. Heç-heçə bizim üçün pozitiv nəticədir.
- Komandanız sonuncu dəfə XII turda qələbə qazanıb. Bu qələbəsizliyin səbəbi nədir: Heyətin geniş olmaması mövsümün sonuna yaxın sizə daha çox çətinlik yaratmayacaq?
- Limitli resursları olan "İmişli" kimi komanda üçün çətindir. Onu da nəzərə almaq lazımdır ki, müəyyən oyunlarda bəxt amili bizə qarşı olub. "Karvan-Yevlax" və "Araz-Naxçıvan"a qarşı matçlarda qələbə əlimizdən çıxdı. Bəxt məsələsində nə isə edə bilmərik. Hər oyunda qalib gəlmək istəyirik. Bizim üçün üç xal qazanmaq əsas məsələdir. Son 8 oyunun ikisində - "Qəbələ" və "Qarabağ" kimi nəhəng rəqiblərə uduzmuşuq. "Turan Tovuz"la görüşdə qol buraxmadıq. Güclü rəqiblərə qarşı müqavimət göstəririk. Hazırda 10-cu pillədə qərarlaşan komandadan 5 xal öndəyik. Təbii ki, super mövqe deyil. Amma biz hər oyunda qalib gəlmək, tilsimi qırmaq istəyirik. Son 11 oyun bizim üçün çox çətin olacaq. Əziyyət çəkəcəyik. Amma buna hazırıq. Ümidimiz odur ki, daha çox zədə almayaq. Zədəlilərimiz də var. Çətin olacaq, məqsədlərimizə uyğun irəliləyirik.
