Sabah Azərbaycanın 17 yaşadək futbolçulardan ibarət yığma komandasını (U-17) Avropa çempionatının final mərhələsinə hazırlıq çərçivəsində növbəti sınaq gözləyir. Sportnet.az-ın məlumatına görə, Təbriz Həsənovun yetirmələri Rusiyadan sonra ukraynalı həmyaşıdları ilə qüvvələrini sınayacaq.
Həmin yoxlama oyunları da 2 gündə və Bakı Olimpiya Stadionunda baş tutacaq. Martın 1-də və 3-də olacaq görüşlər saat 16:00-da başlayacaq.
17 yaşlılarımız ukraynalı həmyaşıdları ilə daha öncə görüşüblər. 2010-cu ilin oktyabrın 30-da Xorvatiyada Avropa çempionatının seçmə qrup mərhələ oyunu qolsuz bərabərliklə bitib. 2014-cü il yanvarın 23-də Türkiyədə beynəlxalq turnir çərçivəsində baş tutmuş matç isə ukraynalıların 2:1 hesablı qələbəsi ilə nəticələnib.
Qeyd edək ki, Təbriz Həsənovun komandası ötən həftə Rusiya U-17-si ilə ilk oyunda 1:5 hesabı ilə darmadağın olunmuş, ikinci matçda isə 1:0 hesablı qələbə qazanmışdı.
