Türkiyənin "Göztəpə" klubu ötən mövsümü "Qəbələ"də keçirən bosniyalı hücumçu Ermin Zetsin adını transfer siyahısına daxil edib. Sportnet.az-ın məlumatına görə, yeni hücumçu almaq istəyən birinci liqa təmsilçisi Hollandiyanın "Alkmaar" klubunda çıxış edən Robert Mükreni də gözaltı edib.
Onlardan hansını transfer etməklə bağlı son qərarı "Göztəpə"nin baş məşqçisi Okan Buruk verəcək. "Qalatasaray"ın əfsanəvi futbolçusu sabah başlayacaq Ərzurum toplanışına yeni mərkəz hücumçusunun gələcəyini bildirib.
Zets heyətində bürünc medal qazandığı "Qəbələ"də 36 oyunda 9 qol vurub. O, ötən yay Azərbaycan klubuna məhz Türkiyədən - Super Liqa təmsilçisi "Balıkesirspor"dan gəlmişdi. Millisinin da üzvü olan hücumçu bundan öncə Türkiyədə 4 mövsüm "Gənclərbirliyi"nin şərəfini qoruyub.
Xatırladaq ki, "Göztəpə"də "Qarabağ"ın hollandiyalı sabiq yarımmüdafiəçisi Leroy Corc çıxış edir. Ancaq Burukun daha çox ehtiyatda saxladığı bu legionerin gedişi, Ağdam klubuna qayıdacağı gözlənilir.
