"Çempionata hazırlığımız yüksək səviyyədə gedir. Avropa Liqasında mübarizəni başa vurduqdan sonra bütün diqqətimizi çempionata yönəltmişik. Rəqiblərimizin hər biri güclüdür, bunu yaxşı dərk edirik". Sportnet.az-ın məlumatına görə, bu fikirləri "Kəpəz"in qapıçısı David Kərimi klubunun rəsmi saytına açıqlamasında bildirib.
"Kəpəz”in yayda heyətinə qatdığı təcrübəli qolkiperi onun üçün yad sima hesab etmək olmaz. Çünki Kərimi iki il oncə də Gəncə təmsilçisinin şərəfini qoruyub: "Bu, mənim "Kəpəz”də ikinci mövsümüm olacaq. Bilirsiniz ki, bir müddət öncə komanda birinci divizionda çıxış edərkən heyətdə idim. Təbii ki, aşağı liqa ilə Premyer Liqa eyni səviyyəli yarış deyil. Elə "Kəpəz” də əvvəlki komanda kimi görünmür. Kollektivimiz indi daha güclüdür. Komandaya diqqət və qayğı var. Aydın məsələdir ki, çempionatda işimiz çətin olacaq. Bizi ağır rəqabət gözləyir. Çünki bütün klublar güclüdür, zəif rəqib yoxdur”.
Xatırladaq ki, "Kəpəz" ilk turda avqustun 8-də "Qəbələ"nin qonağı olacaq.
