"Kayrat" klubu futbol üzrə Qazaxıstan Super Kubokunu qazanıb.
Sportnet.az-ın məlumatına görə, Kaxaber Tsxadadzenin baş məşqçi olduğu komanda "Astana"ya qalib gəlib - 2:0. Qolları 76-cı dəqiqədə Sesar Arso, 90-cı dəqiqədə isə İslambek Kuat vurub. "Kayrat" ardıcıl ikinci il Super Kuboka yiyələnib. Almatı komandası yalnız aktivində 3 belə mükafatı olan "Aktobe"yə uduzur.
Qeyd edək ki, Kaxaber Tsxadadze 2008-ci ildə Bakının "Standard", 2009 - 2014-cü illərdə isə "İnter" komandalarının baş məşqçisi olub. O, baş məşqçi karyerasında ilk dəfə Super Kubok əldə edib. Əvvəllər Tsxadadze 2 dəfə - Tbilisinin "Dinamo" (2004-2005) və Bolnisinin "Sioni" (2005-2006) komandalarına Gürcüstan, "İnter"ə (2009-2010) isə Azərbaycan çempionluğu qazandırıb.
