"Gərgin oyun olacağı məlum idi. Amma biz bunu bilə-bilə oyuna çıxmışdıq".
Bunu Sportnet.az-a açıqlamasında "Zirə"nin futbolçusu Milan Duriç "Neftçi"ni səfərdə 2:1 hesabı ilə yendikləri Azərbaycan Premyer Liqasının XXI tur matçından sonra deyib.
Serbiyalı yarımmüdafiəçi turnir cədvəli baxımından önəmli qələbə qazandıqlarını bildirib: "Düzü, "Neftçi"yə qalib gələcəyimə inanırdım. Baxmayaraq ki, rəqibin heyəti qışdan sonra çox dəyişmiş, keyfiyyətli futbolçular cəlb edilmişdi. Buraxılan qoldan sonra biz dayanmadıq. Əksinə, daha çox meydanda işlədik və iki qol vurub qalib gəldik. Bu qələbə turnir cədvəli baxımından çox əhəmiyyətli idi. Uğurlu nəticələrimizin davamının gəlməsinə çalışacağıq".
Qələbə topunun müəllifi komandasına 3 xal qazandıran qolundan da danışıb: "Vurduğum qolun baxımlı olub-olmaması önəmli deyil. Top mən tərəfə gələndə düşünüb qərar verdim və zərbə endirdim. Əsas odur ki, bu qol bizə əhəmiyyətli qələbə qazandırdı".
