Türkiyənin Sivas şəhərində təşkil olunan 16-cı "Cümhuriyyət Kuboku”nun finalçıları məlum olub. Sportnet.az-ın Türkiyə mətbuatına istinadən məlumatına görə, turnirdə Türkiyə PTT liqasında çıxış edən futbolçularımızı üz-üzə gəlib.
Vaqif Cavadov, Ufuk Budak və Rəhman Hacıyevin klubu "Qaziantep BB” millimizin üzvü Cihan Özkaranın şərəfini qoruduğu "Sivasspor”la qarşılaşıb. 64-cü dəqiqədə Vaqif Cavadovun yerinə meydana daxil olan Rəhman Hacıyev matçda fərqlənməyi bacarıb.
Oyunun əsas vaxtı 3:3 hesabı ilə bitib. Penaltilər seriyasında daha dəqiq olan "Sivasspor” finala vəsiqə qazanıb. "Qaziantep BB” isə III yer uğrunda mübarizə aparacaq.
Qeyd edək ki, turnirin digər görüşündə "Adana Dəmirspor”u yenən "Mersin İdmanyurdu” finalda "Sivasspor”la qarşılaşacaq.
