"Bakı Qaziantepdən gözəl şəhərdi. Orada yaşamaq üçün darıxmışam. Klubda da işlərin mənim üçün yaxşı getmədiyini deyə bilərəm. Çünki komandada elə də çox oynamıram, yalnız bir oyun oynamışam. Azərbaycanda isə hər tur meydana çıxırdım, "Zirə”nin heyətində stabil oynayırdım".
Bu sözləri Sportnet.az-a açıqlamasında "Zirə"nin sabiq futbolçusu, hazırda Türkiyənin "Qaziantep BB” klubunda çıxış edən Nelson Bonilla deyib. Salvadorlu hücumçu yenidən "Zirə”yə qayıtmaq istədiyini etiraf edib: "Zirə”ni daim izləyirəm. Komanda Premyer Liqada çox yaxşı çıxış edir və son vaxtlar ancaq qalib gəlir. "Zirə”nin yeni hücumçuları Sanqare və Qadzeni də görürəm. Onların yaxşı çıxış etməsi həm "Zirə”, həm də Azərbaycan futbolu üçün də yaxşıdır. Mən özüm də "Zirə”yə geri dönmək istəyirəm, niyə də olmasın? Bakını və "Zirə”ni çox sevirəm. Onların məni geri qaytarmaq istəyib-istəmədiyini bilmirəm. Amma mənim üçün Azərbaycana qayıtmaq problem deyil”.
Qeyd edək ki, Nelson Bonilya Azərbaycanı ötən mövsümün sonunda tərk edib.
