Məşhur braziliyalı futbolçu Ronaldinyo ilə "Qəbələ" İdman Klubu arasında müqavilə imzalanıb.
Sportnet.az-ın məlumatına görə, Birləşmiş Ərəb Əmirliklərinin Dubay şəhərində gerçəkləşən imzalanma mərasimi "Burc Əl Ərəb” otelində təşkil olunub. Öncə "Qəbələ”nin kommersiya direktoru Mustafa Aztopal təqdimatında tədbir iştirakçılarına Azərbaycan, ölkə futbolu, Bakı, Qəbələ və klub haqqında, o cümlədən ölkəmizdəki idman hərəkatı haqda məlumat verilib. Ardınca isə 2016-cı ilin oktyabrında Bakıda memorandum imzalayan tərəflər bu dəfə 3 illik anlaşmanı rəsmiləşdiriblər. Müqaviləyə "Qəbələ” İdman Klubu tərəfdən klubun vitse-prezidenti Fariz Nəcəfov, "Ronaldinho Soccer Academy” tərəfdən isə Ronaldinyo imza atıb.
F.Nəcəfov bu müqavilə ilə dünya futboluna töhfə vermək istədiklərini bildirib: "Futbol dünyada və Azərbaycanda elə bir səviyyəyə çatıb ki, ictimai bir tədbirə çevrilib. Biz də Ronaldinyonun vasitəsi ilə həm Azərbaycan, həm də "Qəbələ" adına töhfə vermək istəyirik. Hər kəsə təşəkkür edirəm".
"Qəbələ” və "Ronaldinho Soccer Academy” arasında müqavilənin sentyabrın 1-dən qüvvəyə minməsi nəzərdə tutulub. Qarşıdakı 1 il ərzində yeni akademiyanın bazasının hazır vəziyyətə gətirilməsi planlaşdırılır. Beləliklə, lisenziya xarakteri daşıyan bu müqavilə ilə "Qəbələ” əfsanəvi futbolçunun adını daşıyan akademiyanın Azərbaycandakı eksklüziv hüquqlarına yiyələnib. Müqaviləyə əsasən, klubun üzərinə məktəbin fəaliyyəti üçün baza, təsislər təqdim etmək, şirkətin marka dəyərini qorumaq vəzifələri düşür. "Ronaldinho Soccer Academy” isə eksklüziv ad hüququnu verəcək və lazım olan dəstəyi göstərəcək.
Altı yaşdan yuxarı futbolçular üçün nəzərdə tutulan məktəbdə həm ödənişsiz, həm də ödənişli əsaslarla məşqlər keçiriləcək. Yüksək səviyyəli meydançalarda veriləcək futbol təlimi ilə yanaşı, müxtəlif sosial fəaliyyətlər də nəzərdə tutulur.
Eyni zamanda, Azərbaycan regionları və xarici ölkələrə səfərlər, müxtəlif yarışlarda iştirak idman bünövrəsinin qoyulmasında, yay futbol məktəbləri, seminarlar, "Ronaldinyonun dili – portuqalca” dərsləri futbolçuların fərdi inkişafında rol oynayacaq.
Qeyd edək ki, Ronaldinyonun doğulub boya-başa çatdığı Portu Aleqri şəhərində, həmçinin Birləşmiş Ərəb Əmirliklərinin Dubay şəhərində "Ronaldinho Soccer Academy" fəaliyyət göstərir.
