"Millimiz Almaniyaya qarşı pis təsir bağışlamadı. Bacardıqlarını da meydanda qoydular. Qusarda elə komanda şəklində oyunu izlədik. Almaniya millisinin oyunçularının ustalıq səviyyəsi yüksəkdir. Bu da hamıya aydındır. Səviyyə fərqi öz sözünü dedi. Qaldı ki, millimiz çox yaxşı mübarizə apardı”.
Bunu Sportnet.az-a açıqlamasında milli komandamızın sabiq futbolçusu Ramazan Abbasov deyib. Abbasov Almaniya ilə oyundan sonra daha çox tənqid edilən Əfran İsmayılovun oyununu da dəyərləndirib: "Məncə, Əfran İsmayılov heç də pis oynamadı. Bir səhvinə görə onu tənqid etmək olmaz. Məhəmməd Mirzəbəyov da bacardığı qədər oynadı. Mario Qomesin vurduğu qola görə Məhəmmədi qınamaq olmaz. Qomes kimi hücumçuya qarşı Məhəmməd nə edə bilərdiki? Əfran qol ötürməsini verdi. Almaniyaya qol vurmaq asan məsələ deyil. Biz bunu bacardıqsa özü böyük işdir. Qarşıda bizi Şimali İrlandiya ilə oyun gözləyir. Qrupdan çıxmaq şansımız var, ancaq məncə azdı. Çünki inanmıram ki, Şimali İrlandiya bu şansı qaçırtsın”.
Almaniyaya qarşı keçirdiyi oyundan sonra Avropanın bir neçə klubu Qara Qarayevlə maraqlanmağa başlayıb. Abbasov bu xəbərə də münasibət bildirib: "Almaniyaya qarşı yüksək səviyyədə oyun keçirdisə, Qara ilə Avropa klublarının maraqlanması normal haldır. Məncə, elə Qara meydanda ən yaxşılardan idi”.
