2018-ci il dünya çempionatının seçmə qrup matçı çərçivəsində keçirilən Azərbaycan - Almaniya oyununa bileti olan azarkeşlərdən heç biri bayırda qalmayıb.
Sportnet.az-ın məlumatına görə, bunula bağlı AFFA-nın rəsmi "feysbuk" səhifəsində məlumat yerləşdirilib.
Bildirilir ki, bileti olan bir qrup azarkeşin stadiona girişində gecikmələr olsa da, kiminsə bayırda qalması faktı qeydə alınmayıb. Federasiya azarkeşləri beynəlxalq oyunlara start fitindən 2 saat əvvəl arenaya gəlməyə səsləyib: "Azarkeşlərin stadiona tez gəlməsi və stadionda vaxtlarını səmərəli keçirmələri üçün azarkeş zonaları təşkil edilir. Həmçinin azarkeşlərin təhlükəsizliyinin təmin edilməsi üçün oyun biletində stadiona 2 saat öncədən gəlmələri barədə məlumat göstərilib. Gələcəkdə bu cür neqativ hallarla rastlaşmamaq üçün oyun biletinin üzərində də qeyd edildiyi kimi, oyuna 2 saat qalmış stadiona gəlməyinizi və yalnız biletinizdə qeyd edilən yerlərdə əyləşməyinizi xahiş edirik".
