Milli komandaların oyunları ilə əlaqədar fasilədən yararlanan "Neftçi" və "Qəbələ" komandaları arasında yoxlama matçı keçirilir.
Sportnet.az-ın məlumatına görə, oyun İsmət Qayıbov adına Bakıxanov qəsəbə stadionundakı təlim-məşq bazasında təşkil olunub.
Matçı müvafiq olaraq, vitse-prezidentlər Elnur Eyvazovla Fariz Nəcəfov başda olmaqla, hər iki klubun rəsmiləri və bir qrup azarkeş də izləyib.
Görüş meydan sahiblərinin üstünlüyü ilə başlayıb. Bir epizodda Huqo Barqasın zərbəsi dirəyə tuş gəlib. Lakin matça tezliklə nəzarəti ələ alan "Qəbələ" 22-ci dəqiqədə istəyinə çatıb. Rəşad Əzizli ilk zərbəni qaytarsa da, Elvin Məmmədovun təkrar zərbəsi dəqiq olub. Bu epizodda Əzizli dirəyə dəyərək zədələnib və yerini Maksim Vayloya verib.
45-ci dəqiqədə "Neftçi" daha bir itki ilə üzləşib. Bu dəfə Rəhman Hacıyev Endi Hallideyi vurduğu üçün birbaşa qırmızı vərəqə alıb. Tərəflərin razılığı ilə ikinci hissədə Hacıyevin yerinə yeni oyunçu buraxılıb və oyun bərabər sayda futbolçu ilə davam etdirilib.
57-ci dəqiqədə "Qəbələ" növbəti qolu vurub. Bu dəfə Famussa Kone qonaqların hücumunu qolla tamamlayıb. Bir dəqiqə sonra isə Vaylo sonuncu ümid foluna görə qırmızı vərəqə alıb. Bu dəfə qapı Sənan Əlizadəyə tapşırılıb. Beləliklə, "Neftçi" yoxlama matçında 3 qapıçı dəyişikliyindən yararlanıb.
Görüşün sonlarında meydan sahibləri yenidən fəallaşaraq, təsəlli qolunu vurmağa müvəffəq olublar. Mirabdulla Abbasovun uzaq məsafədən zərbəsi dəqiq olub.
Beləliklə, görüş "Qəbələ"nin qələbəsi ilə yekunlaşıb.
Yoxlama oyunu:
16:00 "Neftçi" - "Qəbələ" 1:2
Qollar: Mirabdulla Abbasov, 45 - Elvin Məmmədov, 22. Famussa Kone, 57
Qırmızı vərəqələr: Rəhman Hacıyev, 45. Maksim Vaylo, 58 (hər ikisi "Neftçi")
"Neftçi”nin əsas heyəti: Rəşad Əzizli, Məqsəd İsayev, Kirilo Petrov, Pavel Dreksa, Mateo Mujek, Rəşad Sadiqov, Rəhman Hacıyev, Elnur Cəfərov, Emin Mahmudov, İqnasio Herrera, Huqo Barqas.
"Qəbələ"nin start heyəti: Dmitri Bezotosnı, Vitali Vernidub, Rasim Ramaldanov, Tellur Mütəllimov, Deyv Bultuis, Elvin Camalov, Asif Məmmədov, Baqali Dabo, Endryu Hallidey, Ekiqo Ehiosun, Ülvi İsgəndərov
