Dünyanın əksər ölkələrində, o cümlədən, UEFA bayrağı altında keçirilən oyunlar gələn həftədən bir saat gec başlayacaq. Sportnet.az-ın məlumatına görə, bu, oktyabrın 29-na keçən gecə təxminən 70 ölkədə saatların əqrəblərinin bir saat geri çəkilməsi ilə əlaqədardır.
Artıq "Qarabağ"ın noyabrın 22-də Çempionlar Liqasında İngiltərənin "Çelsi" klubu ilə keçirəcəyi son ev oyunu saat 20:00-da deyil, saat 21:00-da başlanacaq. Ağdam komandasının oktyabrın 31-də "Atletiko" ilə İspaniyada, dekabrın 5-də isə "Roma" ilə İtaliyada oynayacağı qarşılaşmaların start fiti isə Bakı vaxtı ilə saat 22:45-də deyil, saat 23:45-də çalınacaq. İndi Çempionlar Liqasındakı əksər oyunlar məhz saat 23:45-də başlanacaq.
Avropa Liqasında da eyni hal müşahidə olunacaq. Artıq Qazaxıstanda saat 20:00-da başlanacaq "Astana"nın ev oyunu istisna olmaqla, digər qarşılaşmalar saat 22:00-da və 00:05-də başlanacaq.
Eyni hal 2018-ci il dünya çempionatının "pley-off" oyunlarına da şamil olunacaq. Noyabrın 12-də İsveçrə - Şimali İrlandiya matçı saat 21:00-da, qalan oyunlar saat 23:45-də start götürəcək.
