"Bu oyuna həqiqətən də ciddi hazırlaşmışdıq. Daha əvvəl "Neftçi" ilə səfər matçında xal itirmişdik. Evdə "İnter"ə qalib gələrək, 3 xal qazanmaq istəyirdik. Doğrudan da çətin oyun keçdi. Əvvəlki 7 oyunda "İnter"ə qalib gəlməmişdik. Amma sevinirik ki, bu dəfə qələbə əldə etdik. Stadionu dolduraraq, bizi sonadək dəstəkləyən azarkeşlərə təşəkkür edirəm".
Bunu Sportnet.az-a açıqlamasında "Sumqayıt" komandasının qapıçısı Fərhad Vəliyev evdə "İnter"i 3:1 hesabı ilə yendikləri Topaz Premyer Liqasının XI tur matçından sonra deyib.
37 yaşlı qapıçı ötən tur "Neftçi"yə 1:2 hesabı ilə uduzduqları görüşdə səhvə yol verdiyini etiraf edib: "Xüsusən, ikinci qolda səhvim var idi. Düşünmürdüm ki, Rəhman Hacıyev birbaşa qapıya zərbə endirər. Çalışırıq ki, səhvlərin üzərində işləyək və bir daha belə hallara yol verməyək".
Vəliyev "Sumqayıt"ın gənc qapıçısı Mehdi Cənnətov barədə də danışıb: "Qarşıdakı turlarda Cənnətova da şans veriləcəyini düşünürəm. Fikrimcə, o da özünü yaxşı tərəfdən göstərəcək və komandaya xeyir verəcək".
