Almaniyanın "Frayburq" klubunda çıxış edən türkiyəli futbolçu Çağlar Söyüncü karyerasını İngiltərənin "Arsenal" klubunda davam etdirə bilər.
Sportnet.az-ın məlumatına görə, bu barədə 22 yaşlı müdafiəçini yetişdirən Türkiyənin "Altınordu" klubunun prezidenti Mehmet Seyid Özkan "Fanatik"ə açıqlamasında deyib. O, Söyüncünün "Arsenal"la razılıq əldə etməyə yaxın olduğunu söyləyib: "London klubu bizdən onun gənclərdən ibarət komandada çıxış etdiyi vaxta dair məlumatlar istəyib".
Qeyd edək ki, Çağlar Söyüncü "Frayburq"a 2016-cı ildə 2,65 milyon avro müqabilində "Altınordu"dan keçib. O, Almaniya klubunda 2 mövsüm ərzində 54 oyuna çıxıb və 2 məhsuldar ötürmə ilə yadda qalıb.
