Qazaxıstanın "Astana" klubunun prezidenti Sayan Hamitjanov Azərbaycan millisinin futbolçusu Riçard Almeyda ilə bağladıqları müqaviləni şərh edib.
Sportnet.az klubun rəsmi saytına istinadən xəbər verir ki, Hamitjanov Almeydanı çoxdan izlədiklərini bildirib. Onun sözlərinə görə, Braziliya əsilli yarımmüdafiəçi son illər Azərbaycanın ən yaxşı komandası "Qarabağ"ın liderlərindən olub: "Bu klubda çıxış etdiyi müddətdə Riçard avrokubokların qrup mərhələlərində zəngin təcrübə toplayıb. O, Çempionlar Liqası və Avropa Liqasında 55 oyun keçirib. Kifayət qədər məhsuldardır: Həm ötürmə edə, həm də qol vura bilir. Biz onun Azərbaycandakı kimi, Qazaxıstanda da uyğunlaşma dövrünü qısa müddətdə keçəcəyinə ümid edirik. Oyun imkanları və xüsusiyyətlərinin baş məşqçi Roman Qriqorçuka Azərbaycanda çalışdığı dövrdən yaxşı tanış olması faktı az önəm kəsb etmir. Ümidvarıq ki, Almeydanın yüksək fərdi keyfiyyətləri, böyük avrokubok təcrübəsi bizə cari mövsümdə qarşımıza qoyduğumuz məqsədlərin həllində yardımçı olacaq".
Qeyd edək ki, Riçard Almeyda ilə müqavilənin müddəti və detalları açıqlanmayıb.
