İtaliyanın "Yuventus" klubunun futbolçusu Kriştianu Ronaldu yeni nailiyyətə imza atıb.
Sportnet.az-ın məlumatına görə, portuqaliyalı hücumçu A Seriyasının XXIII turunda "Sassuolo" ilə səfər oyununda da fərqlənib. Bu, Ronaldunun cari mövsüm ərzində bütün yarışlarda 20-ci qolu olub.
Beləliklə, o, ardıcıl 13-cü mövsüm ən azı 20 qol vurmağı bacarıb. 34 yaşlı forvard əvvəllər İngiltərə "Mançester Yunayted"ində 3, İspaniya "Real Madrid"ində 9 mövsüm ərzində bu cür məhsuldarlıq göstərib.
Qeyd edək ki, "Yuventus" "Sassuolo" ilə görüşdə 3:0 hesabı ilə qalib gəlib. 23-cü dəqiqədə Sami Xedira, 70-ci dəqiqədə Kriştianu Ronaldu və 86-cı dəqiqədə Emre Can fərqlənib. Bununla da Turin komandası xallarını 63-ə çatdıraraq, liderliyini inamla davam etdirib. İkinci pillədəki "Napoli"nin 52, 11-ci pillədəki "Sassuolo"nun 30 xalı var.
