Azərbaycan Premyer Liqasında VI turun son oyunu keçirilib.
Sportnet.az-ın məlumatına görə, "Kapital Bank Arena"da "Sumqayıt" "Zirə"ni qəbul edib. Görüş meydan sahiblərinin qələbəsi ilə yekunlaşıb - 2:1.
Komandalar meydana Ermənistan Silahlı Qüvvələrinin Gəncə şəhərində törətdiyi terror aktının qurbanlarına mənəvi dəstək olaraq, meydana həmin şəhərin təmsilçisi "Kəpəz"in formaları ilə çıxıblar. Tribunalarda Azərbaycan bayraqları dalğalanıb. Oyun isə dövlət himninin səsləndirilməsi ilə başlayıb.
"Sumqayıt" hesabı 30-cu dəqiqədə açıb. Rəhim Sadıxov penaltini dəqiq yerinə yetirib. Bundan 2 dəqiqə əvvəl isə onun komanda yoldaşı Əli Qurbani analoji imkandan yararlana bilməyib.
"Zirə" 35-ci dəqiqədə bərabərlik qolunu vurub. Ötən tur "Neftçi" ilə matçda olduğu kimi yenə Davit Volkov fərqlənib.
59-cu dəqiqədə isə "Sumqayıt"ın futbolçusu Tellur Mütəllimov uzaq məsafədən baxımlı qolla yekun nəticəni müəyyənləşdirib.
90+4-cü dəqiqədə Kərim Diniyev sonuncu ümid foluna görə qırmızı vərəqə alaraq, "Zirə"ni azlıqda qoyub.
Bu qələbədən sonra xalını 11-ə çatdıran "Sumqayıt" vahid liderə çevrilib. 10 xala malik "Zirə" isə 2-ci pilləyə enib.
Qeyd edək ki, turun əvvəlki oyunlarında "Qarabağ" "Qəbələ"ni 3:0, "Neftçi" "Sabah"ı 1:0 hesabı ilə yenib. "Səbail" - "Keşlə" matçında isə qalib müəyyənləşməyib.
------------------------------
Azərbaycan Premyer Liqasında VI turun daha bir oyunu keçirilib.
Sportnet.az-ın məlumatına görə, "Neftçi" "Bakcell Arena"da "Sabah"ı qəbul edib.
Komandalar meydana birgə pankartla çıxıblar. Pankart üzərində "Azərbaycanın dövlət müstəqilliyi əbədidir, sarsılmazdır, dönməzdir" yazılıb.
Qarşılaşma meydan sahiblərinin 1:0 hesablı qələbəsi ilə yekunlaşıb. 29-cu dəqiqədə Namiq Ələsgərov komandasına qələbə qazandıran qola imza atıb. 75-ci dəqiqədə "Neftçi" azlıqda qalıb. Mamadu Kane ikinci sarı vərəqəni alaraq meydandan qovulub.
Bu nəticədən sonra "Neftçi" 10-cu xalını qazanıb və ikinci pilləyə yüksəlib. "Sabah" isə 6 xalla 6-cıdır.
Qeyd edək ki, turun son matçında "Sumqayıt" "Zirə"ni qəbul edəcək. Daha əvvəl keçirilmiş matçlarda "Qarabağ" "Qəbələ"ni 3:0 hesabı ilə məğlub edib. "Səbail" - "Keşlə" matçında isə qalib müəyyənləşməyib - 1:1.
-------------------------------------
Bu gün Azərbaycan Premyer Liqasında VI turun son iki oyunu keçiriləcək.
Sportnet.az-ın məlumatına görə, günün ilk matçında "Neftçi" "Bakcell Arena"da "Sabah"ı qəbul edəcək.
5 oyundan 7 xal toplayan "ağ-qaralar" turnir cədvəlinin 5-ci pilləsində qərarlaşıb. Masazır təmsilçisi isə 6 xalla 6-cı sıradadır. İndiyədək ölkə çempionatında rəqibi ilə 7 dəfə üz-üzə gələn flaqman məğlub olmayıb. 6 görüşdə qalib gələn "Neftçi" yalnız 1 matçda heç-heçə edib. Topların nisbəti də meydan sahiblərinin xeyirinədir - 16:2. Əvvəlki oyunlarda ən azı 2 qol vurulub. “Neftçi” heç bir qarşılaşmada meydanı qolsuz və xalsız tərk etməyib.
Tura Sumqayıtda yekun vurulacaq. 8 xalla 3-cü pillədə yer alan şəhərin eyniadlı komandası evdə lider "Zirə" (10 xal) ilə münasibətlərinə aydınlıq gətirəcək. Bunadək çempionatda 19 dəfə qarşılaşan komandaların dualində meydan sahibləri 5, qonaqlar isə 10 qələbə qazanıblar. 4 matçda isə qalib müəyyənləşməyib. "Qartallar"ın vurduğu 26 qola "gənclik şəhəri" təmsilçisi 17 topla cavab verib. "Zirə" ardıcıl 6 oyunda meydanı qolsuz tərk etməyib. "Sumqayıt"ın son 6 ev görüşündə heç-heçə qeydə alınmayıb.
Azərbaycan Premyer Liqası
VI tur
14:00. "Neftçi" - "Sabah" - 1:0
Qol: Namiq Ələsgərov, 29
Qırmızı vərəqə: Mamadu Kane, 75 ("Neftçi")
Hakimlər: Əliyar Ağayev, Namiq Hüseynov, Rahil Ramazanov, Vüqar Həsənli
Hakim-inspektor: Babək Quliyev
AFFA nümayəndəsi: Seymur Səlimli
"Bakcell Arena"
16:00. "Sumqayıt" - "Zirə" - 2:1
Qollar: Rəhim Sadıxov, 30 (penalti ilə). Tellur Mütəllimov, 59 - Davit Volkov, 35
İstifadə edilməmiş penalti: Əli Qurbani, 28 ("Sumqayıt")
Qırmızı vərəqə: Kərim Diniyev, 90+4 ("Zirə")
Hakimlər: Rəhim Həsənov, Cəmil Quliyev, Vüqar Bayramov, Rauf Allahverdiyev
Hakim-inspektor: Feyzulla Feyzullayev
AFFA nümayəndəsi: Maşallah Əhmədov
"Kapital Bank Arena"
Qeyd edək ki, dünən baş tutan oyunlarda "Səbail" evdə "Keşlə" ilə heç-heçəyə razılaşıb - 1:1. "Qarabağ" isə "Qəbələ"ni 3:0 hesabı ilə məğlub edib.
