Azərbaycan Premyer Liqasında IX turun son oyunu keçirilib.
Sportnet.az-ın məlumatına görə, "Bank Respublika Arena"da "Sabah" komandası "Zirə"ni qəbul edib. FIFA referisi Rauf Cabbarovun idarə etdiyi görüş qonaq komandanın qələbəsi ilə yekunlaşıb - 1:0. Yeganə qolu 58-ci dəqiqədə Ağabala Ramazanov vurub.
42-ci dəqiqədə "Sabah"ən hücumçusu Ramil Şeydayev penaltidən yararlana bilməyib. 90+1-ci dəqiqədə isə "Zirə"nin qapıçısı Mateus Albino ikinci sarı vərəqə alaraq, meydandan qovulub.
Bu qələbə sayəsində "Zirə" xallarını 15-ə çatdırıb və eyni xala malik şərikli liderlər "Qarabağ" və "Sumqayıt"la bərabərləşib. Ardıcıl 6-cı məğlubiyyətlə üzləşən "Sabah" isə 6 xalla sonuncu pillədə qalıb.
Qeyd edək ki,turun əvvəlki oyunlarında "Keşlə" "Qəbələ"ni 3:1, "Səbail" "Sumqayıt"ı 2:1, "Qarabağ" isə "Neftçi"ni səfərdə 6:0 hesabı ilə məğlubiyyətə uğradı.
----------
Azərbaycan Premyer Liqasında IX turun daha bir oyunu keçirilib.
Sportnet.az-ın məlumatına görə, "Neftçi" "Bakcell Arena"da "Qarabağ"ı qəbul edib. Qarşılaşma qonaqların 6:0 hesablı qələbəsi ilə başa çatıb.
Hesabı 20-ci dəqiqədə Ağdam təmsilçisinin heyətində Filip Ozobiç açıb. Xorvatiyalı yarımmüdafiəçi 9 dəqiqə sonra penaltidən fərqlənərək dubl edib. 39-cu dəqiqədə Mahir Emreli baxımlı qolla fərqi 3 topa çatdırıb və komandalar fasiləyə bu hesabla yollanıblar.
İkinci hissəyə də hücumlarla başlayan "Qarabağ" 50-ci dəqiqədə Abdullah Zubirin qolu ilə rəqibi 4-cü dəfə meydanın mərkəzinə dəvət edib. Cəmi 2 dəqiqə sonra 5-ci qolu "Neftçi"nin qapısından keçirən Ozobiç het-trik müəllifi olub. Matçda yekun nəticəni Musa Qurbanlı müəyyənləşdirib. Gənc hücumçu 75-ci dəqiqədə komandasının 6-cı qoluna imza atıb.
Bu qələbədən sonra xallarını 15-ə çatdıran "Qarabağ" liderliyə yüksəlib. "Köhlən atlar"ın ehtiyatda daha bir oyunu var. 14 xalı olan "Neftçi" isə 3-cü pilləyə geriləyib.
Tura bu gün keçiriləcək "Sabah" - "Zirə" oyunu ilə yekun vurulacaq.
Qeyd edək ki, turun ilk 2 oyunu dünən baş tutub. "Keşlə" evdə "Qəbələ"yə 3:1, "Səbail" isə "Sumqayıt"a 2:1 hesabı ilə qalib gəlib.
------------------------------------------------
Bu gün Azərbaycan Premyer Liqasında IX turun daha 2 görüşü keçiriləcək. Sportnet.az-ın məlumatına görə, ilk oyun günündə olduğu kimi, yenə qarşılaşmalar Bakıda gerçəkləşəcək.
Əvvəlcə "Bakcell Arena"da "Neftçi" və "Qarabağ" komandaları üz-üzə gələcək. "Bakcell Arena"da təşkil olunacaq qarşılaşmanın baş hakimi Rəhim Həsənov olacaq.
Avropa derbisi öncəsi "Neftçi" 8 oyundan 14 xalla 2-ci, "Qarabağ" 7 görüşdən 12 xalla 3-cü pillədə qərarlaşıb. Bugünkü matçda qalib gələcək komanda liderliyə yüksələcək. Heç-heçə təqdirində isə klubların mövqeləri dəyişməyəcək.
İndiyədək Neftçi" və "Qarabağ" 80 dəfə qarşılaşıb. Bunların 21-də paytaxt, 29-da Ağdam təmsilçisi qələbə qazanıbsa, 30 oyunda heç-heçə qeydə alınıb. Topların nisbəti də son illərin çempionunun xeyrinədir - 73:85.
Üstünlüyünə rəğmən, “Qarabağ” "Neftçi"yə axırıncı üç matçda qalib gəlməyib. Bakı komandası öz meydanındakı son iki qarşılaşmada qələbə qazanmayıb.
Günün yekun matçında isə "Sabah" "Bank Respublika Arena"da "Zirə"ni qəbul edəcək. Əslində bu görüş noyabrın 6-da keçirilməli idi. Lakin "Sabah"ın heyətində koronavirus şübhəsi olan futbolçuların aşkarlanması səbəbindən oyun bu günə təxirə salınıb.
Son 5 qarşılaşmasından məğlub ayrılan "Sabah" hazırda 6 xalla sonuncu pilləqə qərarlaşıb. Visente Qomesin baş məşqçi olduğu kollektiv axırıncı qələbəsini III turda səfərdə məhz "Zirə" üzərində qazanıb. Rəşad Sadıqovun baş məşqçi olduğu kollektiv isə hazırda 12 xalla 4-cü pillədə qərarlaşıb. Qələbə təqdirində, "Sabah" bir pillə irəliləyəcək. "Zirə"yə isə qalibiyyət hətta şərikli liderlik qazandıra bilər.
İki komanda indiyədək 8 dəfə üz-üzə gəlib. Bunların 4-də "Sabah", 2-də "Zirə" üstün olub. Daha 2 matçda qalib müəyyənləşməyib. Topların nisbəti də "Sabah"ın xeyrinədir - 11:9.
Digər tərəfdən, “Sabah”ın ev oyunlarında ən azı 3 qol vurulub. “Zirə” isə son 5 matçda yalnız 1 dəfə uduzub.
Görüşü FIFA referisi Rauf Cabbarov idarə edəcək.
8 noyabr
Azərbaycan Premyer Liqası, IX tur
15:00. “Neftçi” – “Qarabağ” - 0:6
Qol: Filip Ozobiç, 20; 29 (pen.), Mahir Emreli, 38, Abdullah Zubir, 50, Filip Ozobiç, 52, Musa Qurbanlı, 75
Hakimlər: Rəhim Həsənov, Namiq Hüseynov, Cəmil Quliyev, Orxan Məmmədov
Hakim-inspketor: Babək Quliyev
AFFA nümayəndəsi: Seymur Səlimli
“Bakcell Arena”
17:00. “Sabah” – “Zirə” - 0:1
Qol: Ağabala Ramazanov, 58
İstifadə olunmamış penalti: Ramil Şeydayev, 42 ("Sabah")
Qırmızı vərəqə: Mateus Albino ("Zirə")
Hakimlər: Rauf Cabarov, Elşad Abdullayev, Nahid Əliyev, Fərid Hacıyev
Hakim-inspektor: Ömər Paşayev
AFFA nümayəndəsi: Maşallah Əhmədov
“Bank Respublika Arena”
Qeyd edək ki, ilk oyun günündə "Keşlə" "Qəbələ"ni 3:1, "Səbail" "Sumqayıt"ı 2:1 hesabı ilə yenib.
