Belarusun idman naziri Sergey Kovalçuk futbol üzrə ölkə çempionatının Rusiya Premyer Liqası ilə birləşdirilməsini təklif edib.
Sportnet.az-ın məlumatına görə, 54 yaşlı funksioner beynəlxalq idman federasiyalarının sanksiyaları fonunda birgə çempionatların təşkilini nəzərdən keçirməyin mümkünlüyünü vurğulayıb.
O bildirib ki, mövcud şəraitdə məşqçi və idmançıların əziyyət çəkməməsi vacibdir: "İdmançılar başa düşməlidirlər ki, onların maraqları pozulmayacaq. Birgə təlim-məşq toplanışı, turnirlərin keçirilməsi məsələləri fəal şəkildə işlənir və yarışların təqviminə operativ dəyişikliklər edilir. Bunun üçün maliyyə var. Birgə liqaların yaradılması imkanları üzərində çalışırıq. Düşünürəm ki, "Zenit", MOİK və "Spartak" (Moskva) kimi komandalar Minskə gəlsələr, azarkeşlər bundan məmnun ola bilərlər".
Qeyd edək ki, FIFA və UEFA Rusiya yığmaları və klublarını öz bayraqları altında keçirilən beynəlxalq turnirlərdən kənarlaşdırıb.
