Misli Premyer Liqasında X tura yekun vurulub.
Sportnet.az-ın məlumatına görə, günün ikinci oyununda "Qarabağ" "Sumqayıt"ı qəbul edib.
"Azersun Arena"dakı qarşılaşma "köhlən atlar"ın 3:1 hesablı qələbəsi ilə yekunlaşıb.
Görüşdə ilk qolu qonaqlar vurub. "Gənclik şəhəri" təmsilçisinin heyətində Almir Aqanspahiç 56-cı dəqiqədə fərqlənib. Ağdam klubunun qollarına 67-ci və 88-ci (penalti) dəqiqələrdə Ramil Şeydayev, 73-cü dəqiqədə Musa Qurbanlı imza atıb.
Bu matçda zədəsini sağaldan Maksim Medvedev və Kevin Medina start heyətdə yer alıb. Yunanıstan "Olimpiakos"u ilə qolsuz başa çatan Avropa Liqasının IV tur matçında ilk "11-lik"də yer almış futbolçuların hamısı bu dəfə ehtiyatda olublar. Ramil Şeydayev, Abdullah Zubir, Marko Veşoviç, Bədavi Hüseynov və Ovusu Kvabena fasilədən sonra meydana daxil olublar. Dubl müəllifi olan Şeydayev qol sayını 9-a çatdıraraq, bomvardirlər siyahısında vahid liderə çevrilib. Daha bir topun müəllifi Musa Qurbanlı isə 8 qolla ikinci yerdə gedir.
Xallarının sayını 27-ə çatdıran "Qarabağ" birinci pillədə qərarlaşıb. "Sumqayıt" 4 xalla 9-cu sıradadır.
Qeyd edək ki, günün ilk görüşündə "Neftçi" Gəncədə "Kəpəz"i iki cavabsız qolla üstələyib. Turun əvvəlki oyunlarında "Şamaxı" evdə "Qəbələ" ilə 1:1, "Səbail" səfərdə "Turan Tovuz"la 2:2 hesablı heç-heçə edib, "Sabah" isə doğma meydanda "Zirə"yə qalib gəlib - 1:0.
------------------------------
Misli Premyer Liqasında X turun daha bir oyunu keçirilib.
Sportnet.az-ın məlumatına görə, günün ilk matçında "Kəpəz" Gəncədə "Neftçi"ni qəbul edib.
Gəncə şəhər stadionundakı qarşılaşma "ağ-qaralar"ın 2:0 hesablı qələbəsi ilə yekunlaşıb. Paytaxt təmsilçisinin heyətində 17-ci dəqiqədə Emin Mahmudov, 82-ci dəqiqədə Kenni Sayef fərqlənib.
Bölgə klubunda Zamiq Əliyev 62-ci dəqiqədə qırmızı vərəqə alaraq komandasını azlıqda qoyub. 21 yaşlı yarımmüdafiəçi görüşü ləngidən Kenni Sayefi başla vurduğu üçün meydandan qovulub.
Bu nəticədən sonra xallarının sayını 22-yə çatdıran "Neftçi" üçüncü pillədə qərarlaşıb. 4 xala malik "Kəpəz" "Sumqayıt"la birlikdə 8-9-cu yerləri bölüşdürür.
Qeyd edək ki, günün ikinci görüşündə "Qarabağ" "Sumqayıt"ı qəbul edəcək. Turun əvvəlki oyunlarında "Şamaxı" evdə "Qəbələ" ilə 1:1, "Səbail" səfərdə "Turan Tovuz"la 2:2 hesablı heç-heçə edib, "Sabah" isə doğma meydanda "Zirə"yə qalib gəlib - 1:0.
--------------------------------------
Bu gün Misli Premyer Liqasında X tura yekun vurulacaq.
Sportnet.az-ın məlumatına görə, son oyun günündə 2 qarşılaşma baş tutacaq.
Günün ilk matçında "Kəpəz" "Neftçi"ni qəbul edəcək. Gəncə təmsilçisi bu mövsüm ilk dəfə ev oyununu doğma şəhərdə keçirəcək. Hazırda paytaxt təmsilçisi 19 xalla turnir cədvəlinin 3-cü pilləsində qərarlaşıb. "Sarı-göylər" isə 4 xalla 8-cidir.
Komandalar indiyədək ölkə çempionatına təsadüf edən Azərbaycan derbisində 52 dəfə üz-üzə gəliblər. Bunların 18-də meydan sahibləri, 25-də qonaqlar qələbəni bayram edib. 9 qarşılaşma heç-heçə ilə yekunlaşıb. Topların nisbətində də "ağ-qaralar"ın aşkar üstünlüyü var.
“Neftçi” son 4 matçda rəqibinə qalib gəlib. Son iki oyunda 3 və ya daha çox qol vurulub.
Tura "Qarabağ" - "Sumqayıt" görüşü ilə yekun vurulacaq. Ağdam klubu 8 oyundan maksimum nəticə ilə 2-ci sırada yer alıb. "Gənclik şəhəri" təmsilçisinin isə 4 xalı var və 9-cu pillədə gedir.
İki kollektiv bunadək Premyer Liqada öz aralarında 40 görüş keçirib. "Köhlən atlar" 40, Samir Abasovun baş məşqçi olduğu komanda isə cəmi 5 qələbə qazanıb. 5 qarşılaşmada qalib müəyyənləşməyib. Son Azərbaycan çempionunun vurduğu 93 qola rəqibi 18 q=topla cavab verib.
“Qarabağ” son 13 ev oyununda qələbə qazanıb. “Sumqayıt” 6 qarşılaşmada xal əldə etməyib, 5 matçdır fərqlənə bilmir.
Misli Premyer Liqası
X tur
16 oktyabr (bazar)
15:00. “Kəpəz” – “Neftçi” - 0:2
Qollar: Emin Mahmudov, 17. Kenni Sayef, 82
Qırmızı vərəqə: Zamiq Əliyev, 62 ("Kəpəz")
Hakimlər: Tural Qurbanov, Eyyub İbrahimov, Rahil Ramazanov, Rövşən Rəcəbov
Hakim-inspektor: Əmrah İbrahimov
Gəncə şəhər stadionu.
17:30. “Qarabağ” – “Sumqayıt” - 3:1
Qollar: Ramil Şeydayev, 67. Musa Qurbanlı, 73. Ramil Şeydayev, 88 (p) - Almir Aqanspahiç, 56
Hakimlər: Əliyar Ağayev, Zeynal Zeynalov, Akif Əmirəli, Əli Əliyev
Hakim-inspektor: Ömər Paşayev
“Azersun Arena”
Qeyd edək ki, turun əvvəlki oyunlarında "Şamaxı" evdə "Qəbələ" ilə 1:1, "Səbail" səfərdə "Turan Tovuz"la 2:2 hesablı heç-heçə edib, "Sabah" isə doğma meydanda "Zirə"yə qalib gəlib.
